Tirana mikpritëse e artistëve kinezë

"Aromë arti- Një brez, një rrugë" titullohej ceremonia kulturore e zhvilluar mbrëmjen e së hënës në mjediset e Muzeut Historik Kombëtar në Tiranë si një nga veprimtaritë për nder të 70 vjetorit të themelimit të Republikës Popullore të Kinës dhe në kuadër të 70 vjetorit të vendosjes së marrëdhënieve diplomatike dypalëshe. Një ekspozitë e Artit Tradicional të Nanjingut, organizuar me mbështetjen e Ambasadës së Kinës në Tiranë dhe Federatës së Kulturës dhe Artit të qytetit të Nanjingut, në prani të ambasadorit të Kinës zotit Zhou Ding, zëvendës ministres shqiptare të kulturës Valbona Shujaku, drejtorit të Komitetit të Arsimit, Kulturës dhe Shëndetit të Bashkisë së Nanjingut Chen Wei, drejtorit të Muzeut Historik Kombëtar Dorian Koçi, kreut të Shoqatës së Miqësisë Shqipëri- Kinë Spartak Nano, kreut të Shoqatës Kulturore Alb-China Iljaz Spahiu, të ftuarve dhe përfaqësuesve të medias, ngjalli një interes të veçantë tek vizitorët.

Sinologu i njohur Iljaz Spahiu hapi ceremoninë, duke theksuar se këto veprimtari synojnë nxitjen e shkëmbimeve kulturore midis dy vendeve tona.

Ambasadori i Kinës në Tiranë, Zhou Ding duke përshëndetur tha se disa prej veprave të shfaqura në ekspozitë tregojnë miqësinë shqiptaro-kineze, duke theksuar se kultura pasqyron më së miri shpirtin e një vendi dhe një kombi. Kultura kineze dhe ajo shqiptare gëzojnë karakteristika të përbashkëta të hapjes dhe gjithëpërfshirjes, që afrojnë natyrshëm njera-tjetrën.

Më tej drejtori i Muzeut Historik Kombëtar Dorian Koçi tha se "70 vjetori i vendosjes së marrëdhënieve diplomatike midis dy vendeve tona do të mbetet në kujtesën tonë jo thjesht si një akt diplomatik, por dhe si një ngjarje historike, duke treguar një moment të papërsëritshëm në historinë e marrëdhënieve ndërkombëtare". Ai bëri të ditur se dhe në Ekspozitën Bienale të Akuarelit, që po zhvillohet në Muzeun Historik Kombëtar nga 20 deri më 30 shtator ka një përfaqësim të madh të piktorëve kinezë.

Ndërsa drejtori i Komitetit të Arsimit, Kulturës dhe Shëndetit të Bashkisë së Nankinit Chen Wei, pasi i njohu të pranishmit me historinë dhe kulturën e lashtë të qytetit Nankin, tha se mbi 70 punimet e paraqitura në ekspozitë i përkasin disa katëgorive të artit tradicional kinez si piktura, kaligrafia,si dhe prerje letre. Ai shprehu dëshirën për shtimin e shkëmbimeve kulturore dhe njerëzore midis dy vendeve.

Në shenjë miqësie përfaqësuesi i Bashkisë së Nankinit i dhuroi Muzeut Historik Kombëtar një vepër në pikturë të realizuar nga piktori Pu Chunzhou, kryetar i Shoqatës Artistike të qytetit Nankin. Nga ana e tij dhe drejtori i Muzeut Historik Kombëtar Dorian Koçi i dhuroi zotit Chen Wei certifikatën për pjesmarrjen e artistëve kinezë në këte ceremoni.

Të pranishmit pasi panë me interes veprat e artit të ekspozitës ndoqën koncertin e instrumentistëve popullorë kinezë "Tinguj nga Kina" në një nga sallat e Muzeut Historik. Kombëtar. Artistë nga Shoqata e Muzikantëve të Pekinit për rreth një orë performuan pjesë instrumentale me erhu dhe pipa dhe u duartrokitën gjatë nga të pranishmit.

Eda Merepeza