SEPA (Foto ATSH)
Banka Botërore e cilëson një lajm të mirë futjen e Shqipërisë në Tregun Unik të Pagesave në Euro (SEPA).
“Na bën krenarë për kontributin e Bankës Botërore në këtë arritje. Sistemet moderne të pagesave janë thelbësore për arritjen e rritjes së qëndrueshme ekonomike në ekonomitë e Ballkanit Perëndimor: Shqipëri, Bosnjë-Hercegovinë, Kosovë, Mali i Zi, Maqedoni e Veriut dhe Serbi”, shkruan BB në rrjetet sociale, citon “ATSH”.
Sipas BB-së, në nivel vendas, ato mund të nxisin përfshirjen financiare, të reduktojnë përdorimin e parave të gatshme, të zgjerojnë produktet dhe shërbimet e pagesave dhe të nxisin zhvillimin e teknologjisë financiare. Ndërsa, në një nivel ndërkufitar, këto sisteme mund të nxisin ndërveprimin dhe të zvogëlojnë koston dhe kohën e transaksionit të tregtisë dhe remitancave brenda Ballkanit Perëndimor, si dhe me Bashkimin Europian (BE).
Ekonomitë e Ballkanit Perëndimor po bëjnë përparim të rëndësishëm në përafrimin e sistemeve të tyre kombëtare të pagesave me standardet e BE-së, si pjesë e synimeve të tyre të anëtarësimit, me mbështetjen e Bankës Botërore.
Banka Botërore, në bashkëpunim me Këshillin e Bashkëpunimit Rajonal (RCC) dhe Sekretariatin e Marrëveshjes së Tregtisë së Lirë të Europës Qendrore (CEFTA), po zbaton Projektin e Modernizimit të Pagesave në Ballkanin Perëndimor, të sponsorizuar nga Komisioni Europian (KE). Ky projekt synon të mbështesë ekonomitë e Ballkanit Perëndimor për të bërë përparim të prekshëm në përputhje me objektivat kryesore të Tregut të Përbashkët Rajonal dhe Planit të Investimeve Ekonomike dhe Planit të Ri të Rritjes së BE-së për Ballkanin Perëndimor.
“Në Ballkanin Perëndimor, ku vetëm 76 për qind e të rriturve kanë një llogari transaksionesh, sipas “Global Findex”, në ndryshim nga 99 për qind në Eurozonë, pagesat digjitale mund të ndihmojnë në uljen e kostove dhe zgjerimin e aksesit financiar për rreth 1.9 milionë njerëz. Llogaritë e transaksioneve, të cilat mund të përdoren për të kryer ose për të marrë pagesa, shërbejnë si një portë për individët dhe bizneset për të hyrë në shërbime të tjera financiare, edhe pa një marrëdhënie me një bankë. Pagesat digjitale mund të lehtësojnë aksesin në financa dhe të kontribuojnë në mbylljen e boshllëqeve të tilla si pabarazitë gjinore dhe urbane-rurale, duke kontribuar kështu në uljen e pabarazisë”, citohet në njoftimin e BB-së.
