Forumi i biznesit (Foto RTSH)

Me një rritje të investimeve arabe dhe një trend pozitiv të shkëmbimeve tregtare me Emiratet e Bashkuara Arabe, Shqipëria po bëhet gjithnjë e më tërheqëse. 

Gjatë një forumi biznesi mes Shqipërisë dhe Emirateve të Bashkuara, i organizuar nga AIDA, u diskutua për eksplorimin e sektorëve të rinj për të investuar në Shqipëri, bën të ditur “RTSH”.

Gjatë forumit, drejtoresha Ekzekutive e AIDA-S, Laura Plaku, solli një panoramë më të qartë të Shqipërisë për investitorët Arabë që ishin prezentë në forum.

“Shqipëria ka njohur një trend rritës të zhvillimit ekonomik. Ndërtimi, turizmi apo dhe energjia janë ndër sektorët të cilëve vendi po u jep vëmendjen e duhur. Deri në shtator, Shqipëria mirëpriti rreth 9.7 milionë turistë, duke e kthyer në një sektor tërheqës për investimet e huaja”, - u shpreh  drejtoresha ekzekutive e AIDA-s.

Sipas të dhënave nga INSTAT-i, shkëmbimet tregtare mes 2 vendeve kanë pasur ecuri pozitive, ku përgjatë vitit  të shkuar volumet tregtare arritën në 43 milionë euro, ndërsa investimet e huaja në gjysmën e parë të vitit arritën 52 milionë euro.