Qeveria greke (Foto RTSH)

Kryeministri grek Kyriakos Mitsotakis ka përjashtuar nga partia Demokracia e Re, ish kryeministrin konservator Antonis Samaras, njofton rtsh.al.

Ky veprim i tij vjen pas një interviste të ish liderit të kësaj partie në gazetën "To Vima", ku ai ka kritikuar përsëri shumë ashpër kryeministrin Mitsotakis dhe ministrin e Jashtëm Gerapetritis për shkak të politikave që ata po ndjekin si brenda dhe jashtë Greqisë.  Samaras citohet të ketë thënë se “Zoti Mitsotakis si dhe presidenti qipriot, z. Christodoulidis po flirtonin me Erdoganin dhe Ramën”.

Duke mbajtur një qëndrim të kundërt me qeverinë për sa i përket politikës së jashtme, ai bën thirrje indirekte, por të qartë për dorëheqjen e ministrit të Jashtëm Georgos Gerapetritis.

Disa orë pas përjashtimit Samaras me një deklaratë për shtyp ka thënë se «Arroganca dhe mungesa e dukshme e qetësisë shpjegojnë lëvizjen e Ζ. Mitsotakis. I shkëputur nga baza, ai drejton një parti që i ngjan pak Demokracisë së Re, si në marrëdhëniet me Turqinë, në problemet e qytetarëve me shtrenjtësinë e vazhdueshme,

Është hera e dytë në 3 dekadat e fundit që Antonis Samaras përjashtohet nga Demokracia e Re. Herën e parë ai është larguar nga konservatorët pasi nuk ka rënë dakord me babain e kryeministrit të sotëm Konstantinos Mitsotakis në vitin 1993 për emrin e Maqedonisës së Veriut , kur ka dhënë dorëheqjen si ministër i Jashtëm dhe ka shkaktuar zgjedhje të parakohshme që kanë risjellë përsëri në pushtet socialistët e Andrea Papadnreut.

Vlerësohet se përjashtimi i tij i ri nga Demokracia e Re, mund të sjellë turbulenca të reja jo vetëm në gjirin e konservatorëve, por edhe në skenën politike të vendit.