Banka e Shqipërisë kërkon rishikimin e skemës së pensioneve, në mënyrë që ajo të jetë në përputhje me skemat e Bashkimit Europian, deklaroi zv.guvernatorja e Bankës së Shqipërisë, Luljeta Minxhozi, në Komisionin parlamentar të Ekonomisë, gjatë diskutimit të projektbuxhetit 2025.

Banka e Shqipërisë kërkon rishikimin e skemës së pensioneve, në mënyrë që ajo të jetë në përputhje me skemat e Bashkimit Europian, deklaroi zv.guvernatorja e Bankës së Shqipërisë, Luljeta Minxhozi, në Komisionin parlamentar të Ekonomisë, gjatë diskutimit të projektbuxhetit 2025. 

Ajo theksoi se skema aktuale mund të kthehet në një rrezik potencial për ritmin e rritjes ekonomike, shkruan “ATSH”.

Minxhozi tha se zhvillimet aktuale kanë nxjerrë në pah nevojën e rishikimit të skemës së pensioneve. 

“Skema e pensioneve po sfidohet fort nga ndryshimet demografike, plakja e popullsisë dhe emigrimi i krahut të punës. Mbështesim qeverinë në një skemë të re në përputhje me skemat e BE-se. Skemën e pensioneve duhet t’a rishikojmë, sepse bëhet rrezik potencial për ritmin e rritjes ekonomike”,- tha Minxhozi.

Drejtori i Politikës Monetare në Bankën e Shqipërisë, Erald Themeli, vuri në dukje se, sa i takon skemës së re të pensioneve, fillimisht duhet të analizohet informaliteti që qëndron në parametra të larta.

“Ka një shkallë të lartë informaliteti sa i takon deklarimit të pagave. Në gjykimin tonë, përpara se të eksplorohen parametrat e reja të sistemit të pensioneve, do të ishte e udhës të kuptoheshin drejt përmasat e këtij informaliteti, në mënyrë që mos të devijojnë parametrat e skemës së re”,- tha ai.