Foto nga VCG

Presidenti i zgjedhur i SHBA-së, Donald Trump, u takua në Shtëpinë e Bardhë me presidentin në detyrë, Joe Biden, ku u shpreh angazhimi për një kalim të qetë të pushtetit, shkruan “ATSH”.

Të ulur përballë një zjarri në Zyrën Ovale, ish-rivalët shtrënguan duart në prani të gazetarëve.

“Politika është e ashpër. Dhe në shumë raste, kjo nuk është një botë shumë e bukur. Por, tani është ndryshe dhe e vlerësoj shumë”,- deklaroi Trump, duke vlerësuar tranzicionin e qetë të pushtetit mes administratës në largim dhe asaj të re amerikane.

Ky ishte një rikthim i jashtëzakonshëm politik për Trump, i cili u largua nga Uashingtoni në janar 2021 si një udhëheqës i mundur politikisht pasi nxiti një turmë mbështetësish të tij për të sulmuar Kapitolin.

Tani, ai po përgatitet të kthehet në pushtet me atë që ai dhe aleatët e tij GOP e shohin si një mandat për qeverisje.