Foto nga VCG

Qeveria kineze ka shpallur masa të reja për të parandaluar dhe frenuar shkallën e miopisë te fëmijët, që mbetet një shqetësim social në vend. Sipas një dokumenti të publikuar nga Ministria e Arsimit, Komisioni Kombëtar i Shëndetësisë dhe Administrata Kombëtare e Kontrollit dhe Parandalimit të Sëmundjeve, fëmijët e moshës së kopshtit duhet të flenë mbi 10 orë çdo ditë dhe nxënësit e shkollave fillore të flenë plot 10 orë në ditë, shkruan “Xinhua”. Fëmijët në kopshte duhet të angazhohen në aktivitete në natyrë për të paktën dy orë çdo ditë dhe shkollat fillore duhet t'i organizojnë nxënësit që të dalin nga klasa gjatë pushimeve, thuhet në dokument.

Dokumenti përcakton se shkollat fillore duhet të ndjekin një politikë të reduktimit të dyfishtë, që synon të reduktojë detyrat e tepërta të shtëpisë dhe orët e mësimit pas orarit të shkollës.

Mësimet online duhet të kufizohen në 30 minuta për klasë dhe duhet të ketë një pushim prej të paktën 10 minutash ndërmjet klasave, sipas dokumentit.

Qu Jia, president i Grupit të Spitaleve të Syve të Universitetit Mjekësor Wenzhou, tha se dokumenti demonstron vendosmërinë dhe veprimet e autoriteteve arsimore të Kinës në promovimin e zhvillimit gjithëpërfshirës të nxënësve dhe pasqyron një angazhim të fortë për rritjen e shëndetshme të fëmijëve.

Statistikat e fundit zyrtare tregojnë se 51.9 për qind e fëmijëve dhe adoleshentëve kinezë janë miopë, pavarësisht nga një rënie e lehtë në vitet e fundit.