Policë në Paris/VCG

Policia e Parisit do të mobilizojë rreth 4000 oficerë dhe 1600 persona staf të stadiumit për ndeshjen e futbollit Francë-Izrael, për të garantuar sigurinë.

Këto masa vijnë një javë pas shpërthimit të dhunës midis izraelitëve dhe mbështetësve pro palestinezë në Amsterdam, shkruan “RTSH”.

Franca dhe Izraeli do të luajnë në një ndeshje të Ligës së Kombeve të UEFA-s të enjten, ku do të marrë pjesë edhe presidenti francez, Emmanuel Macron.

Në një deklaratë, Këshilli i Sigurisë Kombëtare i Izraelit paralajmëroi qytetarët jashtë vendit që të shmangin ngjarjet sportive dhe kulturore, sidomos ndeshjen në Paris, dhe të jenë të kujdesshëm nga sulmet e dhunshme nën pretendimin e demonstratave.