Presidenti kinez Xi Jinping zhvilloi të premten në Pekin bisedime me homologun e tij italian Sergio Mattarella, që ndodhet për një vizitë shtetërore në Kinë.

Xi vuri në dukje se sivjet është 20-vjetori i vendosjes së partneritetit të gjithanshëm strategjik midis Kinës e Italisë dhe, me këtë rast, të dyja palët publikuan një plan veprimi për të forcuar partneritetin e gjithanshëm strategjik dhe ranë dakord të ruajnë frymën e lashtë të Rrugës së Mëndafshit e të nxitin hyrjen e marrëdhënieve dypalëshe në një etapë të re zhvillimi.

Kreu i shtetit kinez theksoi më tej se respekti i ndërsjellë, besimi reciprok dhe përfitimet e përbashkëta duhet të jenë gjithmonë tipari themelor më dallues i marrëdhënieve Kinë-Itali. Të dyja palët duhet t'i shfrytëzojnë plotësisht rolin e Komitetit Ndërqeveritar Kinë-Itali dhe të mekanizmave të dialogut në fusha të ndryshme, të forcojnë shkëmbimet, të konsolidojnë besimin reciprok, të vazhdojnë të mirëkuptojnë e të mbështesin interesat thelbësorë dhe shqetësimet kryesore të njëra-tjetrës dhe të bëhen partnere strategjike që mbështesin njëra-tjetrën. Pala kineze është e gatshme të zgjerojë importet e produkteve italiane të cilësisë së lartë, të mbështesë investimet e ndërsjella midis sipërmarrjeve të të dy vendeve dhe të vazhdojë të nxisë bashkëpunimin në shkencë e teknologji, mbrojtjen e mjedisit, energjinë e pastër, fluturimet hapësinore dhe fusha të tjera.

Xi Jinping-u vuri në dukje gjithashtu se bota po pëson ndryshime të thella dhe Kina e BE, si dy forca paqësore dhe konstruktive, i përmbahen drejtimit të duhur të komunikimit strategjik, hapjes e bashkëpunimit, shkëmbimeve e mësimit të ndërsjellë, gjë që është e dobishme për të dyja palët dhe për botën. Kina e konsideron Europën si një partnere të rëndësishme në modernizimin kinez dhe të dy palët duhet t'i përmbahen bashkëpunimit me përfitime të përbashkëta e të kontrollojnë siç duhet mosmarrëveshjet, në mënyrë që marrëdhëniet Kinë-BE të tregojnë pjekuri dhe qëndrueshmëri. Kina është e gatshme të forcojë bashkëpunimin me BE-në për të trajtuar sfidat globale dhe shpreson që Italia do të luajë një rol pozitiv në këtë drejtim.

foto CMG

Pas bisedimeve, të dy krerët e shtetit dëshmuan nënshkrimin e një numri dokumentesh bashkëpunimi dypalësh në fushat e kulturës, shkencës e teknologjisë, arsimit dhe binjakëzimit të vendeve të trashëgimisë botërore.

Para bisedimeve, Xi Jinping-u zhvilloi një ceremoni mirëseardhjeje për Mattarella-n në Sallën Veriore të Pallatit të Madh të Popullit.

Në ceremoni u bë një përshëndetje me 21 të shtëna në sheshin "Tiananmen" dhe roja e nderit u rreshtua për të nderuar. Të dy krerët e shtetit u ngjitën në tribunën e kalimit në revistë dhe banda ushtarake luajti himnet kombëtare të Kinës dhe Italisë. Mattarella, i shoqëruar nga Xi, kaloi në revistë rojën e nderit të Ushtrisë Çlirimtare Popullore të Kinës dhe pa paradën.

Të premten në mbrëmje, presidenti Xi Jinping dhe bashkëshortja e tij Peng Liyuan zhvilluan një pritje për presidentin Mattarella dhe të bijën Laura në Sallën e Artë të Pallatit të Madh të Popullit.