Foto nga China Daily
Natyralisti francez Emile Licent (1876-1952) zor se mund ta kishte parashikuar ndikimin që do të kishte ideja e tij, Muzeu Hoangho Paiho në Tianjin, mbi një shekull pas krijimit të tij, në kapërcimin e kufijve kulturorë midis Kinës dhe Francës.
Metamorfoza e Licent me Muzeun e Historisë Natyrore në Tianjin, duke tërhequr rreth 300.000 vizitorë çdo vit, është një dëshmi e vizionit të tij pionier.
Festimet për 110-vjetorin e muzeut nisën në fund të shtatorit, duke dëshmuar një konvergjencë të studiuesve globalë në Tianjin dhe nxitur sipërmarrjet bashkëpunuese në këtë fushë. Kjo nismë ishte një moment kryesor gjatë 60-vjetorit të lidhjeve diplomatike midis Kinës dhe Francës këtë vit.
Përfaqësues nga institucionet franceze, si Shoqëria e Kërkimeve Historike dhe Arkeologjike në Rombies, Muzeu Kombëtar i Historisë Natyrore dhe Muzeu i Historisë Natyrore të Nantes, ishin të pranishëm gjatë eventit përkujtimor, duke evidentuar kështu vijimësinë e lidhjeve mes komunikimit, kërkimit dhe ekspozitës.
Përpara festimeve, Rombies, qyteti i lindjes së Licent, kontribuoi me pamje të rralla të viteve të formimit të tij, duke pasuruar retrospektivën e muzeut mbi trashëgiminë e tij shekullore dhe lidhjet e qëndrueshme diplomatike kino-franceze.
Zhang Caixin, kuratorja e Muzeut të Historisë Natyrore në Tianjin, shprehu optimizëm për thellimin e partneriteteve me homologët francezë.
“Ne jemi të gatshëm të ndërmarrim hapa solidë në komunikimet kërkimore dhe më shumë shkëmbime të personelit”,- tha ajo.
Gjatë eventit u nënshkruan bashkëpunime të rëndësishme me Universitetin Hebei dhe Universitetin e Studimeve të Huaja Tianjin, së bashku me një partneritet të zyrtarizuar me 15 muzetë e historisë natyrore. Tetë institucione të shquara, duke përfshirë Institutin e Paleontologjisë dhe Paleoantropologjisë së Vertebrorëve, i cili është pjesë e Akademisë Kineze të Shkencave, dhe Zyrës së Planifikimit dhe Burimeve Natyrore në Tianjin, dhuruan 2647 ekzemplarë biologjikë.
Vendndodhja aktuale e Muzeut të Historisë Natyrore në Tianjin, vetëm 2.5 kilometra nga ajo origjinale në zonën Wudadao, ruan trashëgiminë e Licent, Muzeun Hoangho Paiho, i cili është ende i hapur për publikun, duke përfshirë arkitekturën e tij origjinale, koleksionet dhe materialet historike.
“Institucioni 110-vjeçar dallohet si i vetmi që ruan ende strukturën e tij origjinale, arkitekturën, koleksionet, ekspozitat, dokumentet dhe materialet e lidhura që nga fillimi i tij”,- tha Zhang.
Sipas saj, muzeu ka bërë përparime të mëdha në shekullin e kaluar me edukimin shkencor, shërbimet dhe kërkimin, me synimin për ringritje të mëtejshme.
Licent, i cili ishte një jezuit, ia kushtoi jetën e tij eksplorimit shkencor në Kinë, duke përshkuar hapësira të gjera të veriut të vendit, duke grumbulluar një thesar prej mbi 200.000 ekzemplarësh gjeologjikë, paleontologjikë, botanikë dhe folklorikë. Ai adoptoi emrin kinez Sang Zhihua. Kontributet e tij në mamologjinë e lashtë në Kinë, duke përfshirë zbulimin e katër grupeve kryesore të gjitarëve të lashtë në provinca të ndryshme, kanë qenë thelbësore në formësimin e peizazhit paleontologjik të vendit.
E njohur për zbulimin e artefaktit të parë paleolitik në Kinë dhe për avancimin e kërkimeve arkeologjike, paleomamologjike dhe antropologjike, trashëgimia e Licent vazhdon si një gur themeli i arkeologjisë prehistorike të Kinës.
Nën vëzhgimin e tij, u bënë zbulime të mëdha. Zbulimet e tij thelbësore thuhet se kanë hedhur themelet për një shekull eksplorimi arkeologjik në vend. Ai dërgoi disa nga kërkimet dhe gjetjet e tij të vlefshme në Francë, ndërsa pjesën më të madhe e la në Kinë në muze. Për shembull, në Muzeun Kombëtar të Historisë Natyrore në Francë ndodhet një skelet i një rinoceronti të lashtë, i zbuluar nga Licent, ndërsa një i ngjashëm është ekspozuar në Tianjin.
Ai u nderua me Legjionin e Nderit nga Franca, si dhe me Medaljen Jiahe, një medalje që u jepej njerëzve që kontribuuan në Kinë në vitet 1920.
Muzeu Hoangho Paiho u emërtua nga Licent për të përkujtuar punën e tij pranë Lumit të Verdhë dhe lumit Haihe.
“Kina ka një pasuri të madhe të fosileve të gjitarëve të fundit Cenozoik për krahasim dhe studim të mëtejshëm, kryesisht falë kontributeve të Licent”,- deklaroi Qiu Zhanxiang, akademik në Akademinë Kineze të Shkencave.
Gao Xing, studiues në Institutin e Paleontologjisë dhe Paleoantropologjisë së Vertebrorëve të Akademisë Kineze të Shkencave, beson se shkrimi i historisë rreth njëqind viteve të arkeologjisë kineze do të fillojë me kërkimin e Licent.
Philippe Guillet, kurator i Muzeut të Historisë Natyrore të Nantes në Francë, thotë se muzeu në Tianjin pasqyron shkëmbimet kulturore mes dy kombeve. Sipas tij, muzeu e bën qytetin të ketë karakteristika unike kulturore.
Gjatë festës së 110-vjetorit nuk pati asnjë familjar të Licent. Por, ngjarjes iu bashkua një prej familjarëve të një partneri kërkimor të Licent në Kinë, mbesa e nipit të Pierre Teilhard de Chardin (1881-1955), e cila është dhe nënkryetare e Miqve të Teilhard de Chardin.
Yu Shuxiang, një studiues që udhëtoi në Francë dhe shkroi biografinë e tij, e shihte Licentin si një urë që lidh shkëmbimet e lashta dhe moderne të shkencës dhe kulturës midis Lindjes dhe Perëndimit.
“Ai ishte një promovues i shkëmbimeve shkencore dhe kulturore midis Kinës dhe Francës. Në këtë drejtim, roli që ai luajti është i pashembullt”,- tha Yu.
Në vitin 2019, Muzeu i Historisë Natyrore në Tianjin u caktua si njësi kryesore e mbrojtjes së trashëgimisë kulturore kombëtare nga Këshilli i Shtetit në Kinë, duke nënvizuar rëndësinë e tij në nxitjen e shkëmbimeve kulturore midis Kinës dhe Francës.
“Ndikimi i thellë i Licent, duke kapërcyer brezat, vazhdon të ndezë narrativat e shkëmbimit shkencor dhe kulturor midis qytetërimeve lindore dhe perëndimore, duke përjetësuar trashëgiminë e tij si një udhërrëfyes në bashkëpunimin ndërkombëtar”,- theksoi Zhang.
