Foto nga VCG

Një gjykatë ruse ka gjobitur “Google” me një shifër me 33 zero, për kufizimin e kanaleve të medias shtetërore ruse në “YouTube”, citon “ATSH” mediet e huaja.

Gjigantit të teknologjisë i është thënë të paguajë 20 000 000 000 000 000 000 000 000 000 000 000 dollarë.

Pavarësisht se është një nga kompanitë më të pasura në botë, kjo është dukshëm më shumë se vlera e “Google” prej dy trilionë dollarësh.

Shuma është shumë më e madhe se PBB-ja totale e botës, e cila vlerësohet nga Fondi Monetar Ndërkombëtar të jetë 110 trilionë dollarë.

Gjoba ka arritur një nivel kaq gjigant sepse, siç ka theksuar agjencia shtetërore ruse e lajmeve “TASS”, ajo po rritet me shpejtësi gjatë gjithë kohës.

Zëdhënësi i Kremlinit, Dmitry Peskov, pranoi se ai as që mund ta shqiptojë këtë numër, por i kërkoi menaxhimit të “Google” që t’i kushtojë vëmendje.

Sipas medieve ruse, gjoba lidhet me kufizimin e përmbajtjes së 17 kanaleve të mediave ruse në “YouTube”. E nisur në vitin 2020, ajo u përshkallëzua pas konfliktit ruso-ukrainas dy vjet më vonë. Kjo bëri që shumica e kompanive perëndimore të tërhiqen nga Rusia. Mediat ruse u ndaluan gjithashtu në Europë, duke nxitur masa hakmarrëse nga Rusia. Në vitin 2022, dega lokale e “Google” shpalli falimentin dhe kompania ka ndaluar ofrimin e shërbimeve të saj tregtare në Rusi. Megjithatë, produktet e saj nuk janë plotësisht të ndaluara në vend.

Ky zhvillim është përshkallëzimi i fundit midis Rusisë dhe gjigantit të teknologjisë amerikane. Në korrik 2022, Rusia gjobiti “Google” me 21.1 miliardë rubla (310 milionë euro) për dështimin për të kufizuar aksesin në atë që e quajti material të ndaluar në lidhje me konfliktin në Ukrainë dhe përmbajtje të tjera.