Presidenti egjiptian (Foto Rtsh)

Egjipti ka propozuar një marrëveshje dyditore për armëpushim, në të cilën katër pengje izraelite në Gaza do të shkëmbehen me të burgosur palestinezë të mbajtur në Izrael.

Propozimi u njoftua nga presidenti egjiptian, Abdel Fattah el-Sisi, në një konferencë shtypi. Ai nuk specifikoi numrin e të burgosurve palestinezë që potencialisht do të liroheshin, shkruan “RTSH”.

Sipas propozimit, nëse armëpushimi dyditor do të mbahet, të dyja palët do të kenë më pas 10 ditë për të negociuar një armëpushim të përhershëm për të marrë ndihmën humanitare dëshpërimisht të nevojshme në Rripin e Gazës, tha Sisi.

Zyrtarët në Gaza thonë se ushtria izraelite nuk ka lejuar që sasia e vogël e ndihmave që arrin në enklavë të shpërndahet në pjesë të Gazës veriore, ku po kryen operacione të reja ushtarake.