Dafina Zeqiri (Foto nga instagrami)

Këngëtarja e njohur Dafina Zeqiri ka publikuar këngën e re “Ta Dish”, që i kushtohet dashurisë së humbur, që pasqyrohet dhe në videoklip. Nëpërmjet këngës “Ta Dish” Dafina tregon për publikun, se si ndjehet një person kur humb një njeri të dashur, duke prekur zemrat e shumë prej dëgjuesve. Dafina ka qenë mjaft aktive me hitet e reja muzikore, por edhe me këtë këngë e ka bërë shumë për vete publikun.

Rita Ora (Foto nga instagrami)

Rita Ora turne në Japoni

Rita Ora ka shkëlqyer këtë javë me paraqitjen e saj skenike, duke ndezur skenën me performancën e saj në ‘Toyosu Pit’ në Tokio të Japonisë. “Rita Ora dukej  mjaft bukur me performancën e mahnitshme dhe veshjen e saj”, ka shkruar për të dhe Daily Mail. Vizita e saj në Japoni vjen pasi thuhet se ajo do të jetë prezantuesja e ‘MTV Europe Music Awards 2024’, e cila do të mbahet në Mbretërinë e Bashkuar muajin e ardhshëm. Sipas këtij burimi këngëtarja është në bisedime të avancuara për të prezantuar ceremoninë që do të mbahet në ‘Co-op Live Arena’ në Manchester më 10 nëntor. Edhe pse ylli është ndarë kohët e fundit nga menaxherja e saj dhe drejtoresha e ‘First Access Entertainment’, Sarah Stennett, ajo tashmë është e përgatitur për projekte të reja. Një burim i tha “The Sun”: “Rita nuk mund të ishte më e emocionuar. Ajo po menaxhon shumë gjëra njëkohësisht, por dashuria e saj e parë do të mbetet gjithmonë muzika, prandaj kur iu kërkua të prezantojë ceremoninë, ajo pranoi menjëherë”. “Bisedimet ndërmjet MTV-së dhe menaxherit të ri të këngëtares Rita Ora po vazhdojnë ende, ndërsa  ata janë duke finalizuar detajet” thekson ‘The Sun’.

Dua Lipa (Foto nga instagrami)

Dua Lipa kryeson në festivalin ‘Austin City Limits’ në Teksas

Një javë pasi filloi të parin nga tre shfaqjet ‘para-turne’, Dua Lipa u kthye në ‘Austin City Limits’ në Austin, Teksas të shtunën, më 12 tetor.

“Në kohën kur ajo doli në skenë për performancën kryesore  ishte e veshur me pantallona të shkurta ngjyrë të kuqe të errët dhe një bluzë po ashtu të shkurtër, veshur me çizme lëkure të zeza deri te gjuri. 29-vjeçarja kishte kombinuar çorapet rrjetë, gjerdan dhe një rrip të zi, duke e mbyllur me pamjen e saj, me flokët në ngjyrë të kuqe” shkruan ‘DailyMail’. Pas shfaqjes, Lipa e ka axhendën mjaft të ngjeshur, ku ka patur disa koncerte. Këtë javë ndodhej për koncert  në Angli, gjithashtu një tjetër në  Cleveland, Ohio, në ‘Rock N’ Roll Hall Of Fame’ më 19 tetor. Pas këtyre koncerteve, ajo do të niset për në Singapor për datën e parë zyrtare të turneut të saj “Radical Optimism” në Stadiumin e Brendshëm të Singaporit më 5 dhe 6 nëntor. Ndërsa deri në muajin dhjetor ajo pritet të shkojë në Indonezi, Filipine, Japoni, Tajvan, Malajzi, Tajlandë, Indi dhe në Korenë e Jugut.

Përgatiti Sava Lena