Foto nga VCG

Shefja e Fondit Monetar Ndërkombëtar (FMN), Kristalina Georgieva, ka paraqitur një parashikim të zymtë për ekonominë globale përpara takimit vjetor të organizatës javën e ardhshme. Sipas saj, ka një rritje të ulët të ekonomisë e shoqëruar me borxh të lartë.

Ajo nuk parashikon një përmirësim, edhe pse vala e madhe e inflacionit po bie dhe ekonomia botërore nuk ka rënë në recesion, shkruan “ATSH”.

Sipas saj, edhe pse shkalla e inflacionit po bie, çmimet mbeten të larta.

Në të njëjtën kohë, ajo theksoi shqetësimet për përshkallëzimin e konfliktit në Lindjen e Mesme dhe potencialin e tij për të destabilizuar ekonomitë e rajonit dhe tregjet globale të naftës dhe gazit.

Në korrik, FMN-ja parashikoi se ekonomia globale do të rritej me 3.2% këtë vit, me një parashikim prej 3.3% për vitin 2025.

FMN-ja dhe Banka Botërore pritet të zhvillojnë takimin e tyre vjetor të hënën, me pjesëmarrjen e ministrave të Financave, përfaqësues nga sektorët financiarë dhe të zhvillimit, si dhe bankierë qendrorë.

Të martën, FMN-ja pritet të publikojë perspektivën e re ekonomike për ekonominë globale.