Kryeministri kinez Li Qiang deklaroi të premten se Kina është e gatshme të punojë me Singaporin për të çuar përpara bashkërisht proceset e tyre drejt modernizimit.
Li i bëri deklaratat në takimin me homologun e Singaporit, Lawrence Wong, gjatë pjesëmarrjes në takimin e liderëve për bashkëpunimin në Azinë Lindore, që u zhvillua në Vientiane të Laosit.
Kryeministri kinez Li Qiang(i djathti) takohet me homologun e Singaporit, Lawrence Wong(i majti)/Xinhua
Ai bëri thirrje për një lidhje më të fortë ekonomiko-tregtare, kërkimin e interesave të përbashkëta dhe zgjerimin e bashkëpunimit në fusha si prodhimi, ekonomia digjitale dhe inteligjenca artificiale. Li sugjeroi gjithashtu thellimin e shkëmbimeve në arsim, kulturë, turizëm, rini dhe nivel lokal, për të promovuar më tej zhvillimin e përbashkët.
Kina është e gatshme të forcojë koordinimin dhe bashkëpunimin shumëpalësh me Singaporin, t'i përmbahet hapjes dhe gjithëpërfshirjes, të promovojë liberalizimin dhe lehtësimin e tregtisë dhe investimeve, të përshpejtojë integrimin ekonomik rajonal dhe të ruajë së bashku paqen dhe stabilitetin në Azi, tha kreu i qeverisë kineze.
Wong nga ana e tij u shpreh se Singapori i përmbahet me vendosmëri politikës së “një Kine”, kundërshton "pavarësinë e Tajvanit" dhe nuk do të përdoret nga asnjë forcë për "pavarësinë e Tajvanit".
Ai shtoi se Singapori është i përkushtuar të ruajë shkëmbimet e nivelit të lartë me Kinën, duke rritur vazhdimisht besimin e ndërsjellë, duke promovuar bashkëpunimin në fusha si ekonomia, ekonomia digjitale, tregjet e palëve të treta dhe duke forcuar shkëmbimet njerëzore.
Wong gjithashtu përsëriti mbështetjen e Singaporit për përfshirjen e Kinës në Marrëveshjen Gjithëpërfshirëse dhe Progresive për Partneritetin Trans-Paqësor (CPTPP) dhe Marrëveshjen e Partneritetit të Ekonomisë Digjitale (DEPA). Ai shprehu gatishmërinë për të mbajtur komunikimin dhe koordinimin me Kinën për çështjet ndërkombëtare shumëpalëshe, për të kundërshtuar bashkërisht proteksionizmin dhe për të kontribuar në promovimin e paqes, stabilitetit dhe lulëzimit rajonal.
