Foto nga CFP

Uragani “Milton”, si një stuhi jashtëzakonisht e rrezikshme e kategorisë 3, me erëra deri në 193 km/orë, goditi bregun perëndimor të Floridës, njoftoi Qendra Kombëtare e Uraganeve në SHBA.

Stuhia ndërpreu energjinë në një pjesë të madhe të Floridës, me mbi 3 milionë shtëpi dhe biznese pa energji që nga mëngjesi i së enjtes, sipas autoriteteve lokale, shkruan “ATSH”.

Më pas, “Milton” u reduktua në një uragan të kategorisë 1, ndërsa shtyhej drejt oqeanit Atlantik. Erërat maksimale të qëndrueshme ishin 150 km/orë.

Sekretari amerikan i Sigurisë Kombëtare, Alejandro Mayorkas, e përshkroi situatën si një çështje jete a vdekjeje.

Edhe para se të mbërrinte uragani, tornadot shpërthyen në disa pjesë të Floridës. Nivelet e ujit u rritën me shpejtësi, pasi erërat e forta çuan ujin e detit në brendësi të vendit.

Meteorologët e parashikuan si një nga stuhitë më të rrezikshme në historinë e shtetit. Miliona njerëzve iu kërkua të evakuoheshin. (Irma)