Ministri shqiptar i Mbrojtjes, Pirro Vengu, priti në takime të ndara ambasadorët e Spanjës dhe Gjermanisë në Tiranë, me të cilët bisedoi për projektet që ka Shqipëria në fushën e mbrojtjes dhe situatën e sigurisë në rajon e më gjerë, shkruan “ATSH”.

Ministri Vengu (Foto Atsh)

Në bisedën me ambasadorin spanjoll, Alvaro Renedo Zalba, ministri Vengu ftoi kompanitë spanjolle të industrisë së mbrojtjes për të eksploruar mundësitë e bashkëpunimit, me qëllim rinovimin e sektorit ushtarak.

Në lidhje me dinamikën e situatës së sigurisë në rajon, si dhe rrugën euroatlantike për vendet e Ballkanit Perëndimor, ministri Vengu theksoi se Shqipëria vlerëson rolin dhe mirëpret qasjen konstruktive të Spanjës për zgjidhje praktike dhe të qëndrueshme.

Ndërsa në takimin me ambasadorin e Gjermanisë, Karl Bergner, ministri Vengu diskutoi për forcimin e kapaciteteve të mbrojtjes dhe investimet në industrinë ushtarake, në kuadër të rigjallërimit të kësaj industrie. Gjatë këtij takimi u theksua rëndësia e infrastrukturës, sidomos lidhur me Korridorin VIII dhe portin e Porto Palermos.

Nga ana e tyre, ambasadorët e vlerësuan si tejet të rëndësishëm kontributin politik dhe ushtarak të Shqipërisë në angazhimet e NATO-s dhe BE-së. (Irma)