Udhëheqësit e Rusisë, Koresë së Veriut, Vietnamit, Laosit dhe Kubës i kanë dërguar kohët e fundit mesazhe ose letra urimi presidentit kinez Xi Jinping, gjithashtu sekretar i përgjithshëm i Komitetit Qendror të Partisë Komuniste të Kinës (PKK), me rastin e 75-vjetorit të themelimit të Republikës Popullore të Kinës (RPK).
Foto nga VCG
Presidenti rus Vladimir Putin shprehu urimet më të përzemërta për palën kineze, duke thënë se, nën udhëheqjen e Xi Jinping-ut, Kina ka pasur arritje të jashtëzakonshme në zhvillimin ekonomik, shoqëror, shkencor e teknologjik dhe ka luajtur një rol të rëndësishëm në zgjidhjen e çështjeve të nxehta ndërkombëtare dhe rajonale.
Ai shtoi se Rusia e vlerëson miqësinë e fqinjësisë së mirë midis dy vendeve dhe është e gatshme të konsolidojë më tej partneritetin e gjithanshëm strategjik të bashkërendimit për epokën e re.
Kim Jong Un, sekretari i përgjithshëm i Partisë së Punëtorëve të Koresë dhe president i Koresë së Veriut, shprehu bindjen se populli kinez, duke u bashkuar ngushtë rreth PKK-së me Xi Jinping-un në krye, do të arrijë me siguri Objektivin e Njëqindvjetorit të Dytë.
Nguyen Phu Trong, sekretari i përgjithshëm i Komitetit Qendror të Partisë Komuniste të Vietnamit dhe president i Vietnamit, shprehu besimin e tij të fortë se, nën udhëheqjen e Komitetit Qendror të PKK-së me Xi Jinping-un në krye, populli kinez do të arrijë me siguri objektivat dhe strategjitë e zhvillimit të shpallura në Kongresin e 20-të Kombëtar të PKK-së dhe do ta shndërrojë Kinën në një vend të madh socialist modern të begatë, të fuqishëm, demokratik, të përparuar nga ana kulturore, harmonik dhe të bukur.
Sekretari i përgjithshëm i Komitetit Qendror të Partisë Revolucionare të Popullit Laosian dhe presidenti i Laosit Thongloun Sisoulith theksoi se Laosi i kushton rëndësi të madhe zhvillimit të bashkëpunimit miqësor me Kinën. Pala laosiane është e gatshme të punojë me Kinën për të promovuar ndërtimin e një komuniteti me fate të përbashkëta Laos-Kinë, duke krijuar në mënyrë të vazhdueshme rezultate të frytshme.
Gjeneral Raul Kastro, udhëheqës i Revolucionit Kuban, dhe Miguel Diaz-Canel, sekretari i parë i Komitetit Qendror të Partisë Komuniste të Kubës dhe president i Kubës, thanë se arritjet e mëdha të RPK-së që nga themelimi i saj 75 vjet më parë dëshmojnë plotësisht se socializmi mund të përballojë në mënyrë efektive sfidat e ndërlikuara globale të sotme. Ata shtuan se Kuba do të mbetet e përkushtuar fuqimisht për thellimin e marrëdhënieve miqësore vëllazërore dhe të veçanta ndërmjet të dy vendeve.
