Foto nga CFP

Ushtria izraelite ka njoftuar ndalimin e tubimeve të mbi 1 mijë njerëzve në Izraelin qendror, masë që hyn në fuqi që nga e premtja, mes tensioneve të përshkallëzuara pas vrasjes së liderit të Hezbollahut, Hassan Nasrallah, njofton RTSH.

Zëdhënësi i ushtrisë, Daniel Hagari, tha se ndalimi është një masë paraprake për të garantuar sigurinë publike në dritën e kërcënimeve të mundshme.

"Ne jemi në gatishmëri si për mbrojtje ashtu edhe për sulm dhe publiku duhet t'u përmbahet udhëzimeve", tha Hagari.

Ai theksoi se kërcënimi “nuk ka përfunduar ende, Hezbollahu ende posedon aftësi”.

Ky njoftim vjen pas një sërë sulmesh ajrore të kryera nga ushtria izraelite që shënjestrojnë pozicionet e Hezbollahut në Liban. Pas vrasjes së liderit të Hezbollahut, ushtria izraelite gjithashtu kërcënoi se do të shënjestrojë liderë të tjerë të lartë të Hezbollahut.

Vrasja e Nasrallah-it shënon një përshkallëzim të rëndësishëm në konfliktin e vazhdueshëm midis Izraelit dhe Hezbollahut. Që nga e hëna e kaluar, sipas Ministrisë libaneze të Shëndetësisë, sulmet ajrore izraelite kanë shkatërruar Libanin, duke vrarë rreth 800 njerëz dhe duke plagosur mbi 2.300 të tjerë. Ministria libaneze raportoi se që nga tetori i kaluar, numri i të vdekurve në Liban ka arritur në 1.622.

Hezbollahu dhe Izraeli janë përfshirë në një luftë ndërkufitare që nga sulmi ushtarak i Izraelit në Gaza pas sulmit ndërkufitar të udhëhequr nga Hamas më 7 tetor. Konflikti i Gazës ka marrë jetën e afër 41.600 njerëzve, kryesisht gra dhe fëmijë. Komuniteti ndërkombëtar ka shprehur shqetësim të thellë për sulmet ajrore të Izraelit në Liban, duke paralajmëruar se ato mund ta transformojnë konfliktin e Gazës në një luftë më të gjerë rajonale.(Fatosi)