Shqipëria dhe Italia nënshkruan një memorandum bashkëpunimi në fushën e sigurisë kibernetike, i firmosur nga drejtori i përgjithshëm i Autoritetit Kombëtar të Sigurisë Kibernetike të Shqipërisë (NCSA), Igli Tafa, dhe drejtori i përgjithshëm i Agjencisë Kombëtare të Sigurisë Kibernetike Italiane (ACN), Bruno Frattasi, shkruan “ATSH”.

Foto nga VCG

Ky është një hap i rëndësishëm në procesin e bashkëpunimit dypalësh midis Italisë dhe Shqipërisë në fushën e sigurisë kibernetike.

Sipas njoftimit të Ambasadës së Italisë në Shqipëri, marrëveshja parashikon bashkëpunim në disa fusha kyçe, duke përfshirë forcimin e kapaciteteve kibernetike, shkëmbimin e informacionit, adoptimin e praktikave të mira, ndarjen e përvojave dhe procedurave në fushën e sigurisë kibernetike, asistencën reciproke në parandalimin dhe menaxhimin e incidenteve kibernetike dhe zhvillimin e projekteve strategjike të përbashkëta.

Protokolli përfaqëson një hap të rëndësishëm përpara në forcimin e marrëdhënieve mes dy vendeve, duke theksuar rëndësinë e sinergjisë ndërkombëtare për t’u përballur me sfidat gjithnjë e më komplekse në fushën e sigurisë kibernetike.

“Shqipëria, e konsideruar si një aktor strategjik në Ballkan, luan një rol qendror edhe për sigurinë kibernetike në këtë zonë”,- thuhet në njoftim.

Nënshkrimi gjithashtu ishte një mundësi për të diskutuar tema të rëndësishme si prezantimi i fushave kryesore të veprimtarisë së ACN-së dhe NCSA-së, gjendja e kërcënimit kibernetik në nivel ndërkombëtar dhe perspektivat e bashkëpunimit të ardhshëm.

“Jo vetëm që do të forcohet kapaciteti për t’iu përgjigjur sulmeve kibernetike, por gjithashtu ky bashkëpunim do të kontribuojë në stabilitetin dhe sigurinë e zonës së Adriatikut, një rajon me rëndësi strategjike për të dyja vendet.

Me Italinë si partnerin e parë tregtar të Shqipërisë, është e rëndësishme që edhe dimensioni i sigurisë kibernetike të jetë në përputhje me nivelet e larta të bashkëpunimit midis dy vendeve”,- thuhet në njoftimin e Ambasadës së Italisë në Tiranë.