Foto nga Xinhua

Kryeministri kinez Li Qiang bëri thirrje të enjten për zbatimin e qëndrueshëm dhe të rregullt të reformës në lidhje me rritjen graduale të moshës ligjore të pensionit, për të ofruar mbështetje të rëndësishme për përparimin e modernizimit kinez.

Li i bëri këto komente gjatë një mbledhjeje të Këshillit të Shtetit mbi mobilizimin e përpjekjeve për reformën.

Li tha se reforma përputhet me kërkesën objektive për të trajtuar në mënyrë proaktive plakjen e popullsisë dhe për të promovuar zhvillimin e popullatës me cilësi të lartë, si dhe me nevojën praktike për çlirimin e plotë të përfitimeve prej talenteve dhe promovimin e modernizimit kinez.

Ai vuri në dukje se reforma është një lëvizje e rëndësishme për të përmirësuar sistemin e sigurimeve shoqërore dhe për të mbrojtur më mirë dhe përmirësuar jetesën e njerëzve.

Kryeministri kinez theksoi respektimin e parimit të pjesëmarrjes vullnetare dhe elasticitetit në zbatimin e politikës së shtyrjes së pensionit dhe garantimin që ajo të pasqyrojë me të vërtetë synimet e punonjësve.

Ai bëri thirrje për formulimin dhe përmirësimin e shpejtë të politikave dhe masave mbështetëse, duke vënë në dukje se duhet të zbatohen sa më shpejt që të jetë e mundur politikat që përputhen drejtpërdrejt me planin e reformës.

Li tha se zgjerimi i punësimit duhet të jetë një masë vendimtare për të mbështetur përparimin e reformës. Ai theksoi zbatimin dhe përsosjen e politikave të punësimit për të diplomuarit e të rinjtë e tjerë, duke garantuar mbrojtjen e të drejtave dhe interesave të punëtorëve.

Ai bëri thirrje gjithashtu për përpjekje konkrete për të forcuar sigurinë dhe shërbimet për moshën e tretë, zbatimin efektiv të politikave për rritjen e pensioneve bazë për banorët dhe pensionistët e qytetit e të fshatit dhe rritjen e koordinimit dhe përshtatjes së sigurimeve pensionale në nivel kombëtar.

Sipas një vendimi të miratuar nga ligjvënësit kinezë javën e kaluar, mosha ligjore e pensionit do të rritet gradualisht nga 60 në 63 vjeç për burrat përgjatë 15 vjetëve që nga viti 2025, nga 55 në 58 vjeç për gratë që punojnë si kuadro dhe nga 50 në 55 për gratë punëtore.

Mosha aktuale ligjore e daljes në pension në Kinë u vendos në vitet '50 të shekullit të kaluar dhe ka mbetur e pandryshuar për më shumë se shtatë dekada.