Zjarret ne Los Anxhelos (Foto Rtsh)

Guvernatori i Kalifornisë shpalli gjendjen e jashtëzakonshme në Los Anxhelos dhe qarqet përreth, për shkak të zjarreve që kërcënojnë metropolin dhe tashmë kanë shkatërruar dhjetëra shtëpi, shkruan “RTSH”.

“Zjarri i urës”, një nga tre zjarret që digjen jashtë kontrollit pranë qytetit të dytë më të madh në Shtetet e Bashkuara, ka shkatërruar tashmë dhjetëra shtëpi dhe ka djegur rreth 200.000 hektarë në “Los Angeles Heights” brenda 24 orëve.

Banorët e disa komuniteteve në veri të metropolit të Kalifornisë u urdhëruan të evakuonin zonën. Të paktën 33 shtëpi, si dhe disa magazina, janë shkatërruar nga zjarri, i cili kaloi edhe në një vendpushim skijimi, thanë autoritetet.

Ky zjarr, i përhapur të dielën, kishte djegur gati 200,000 hektarë deri të mërkurën.

Në verilindje të metropolit, një tjetër zjarr, “Linjë zjarri”, ka djegur 140 mijë hektarë.

Banorëve të fshatrave malore iu kërkua të largoheshin nga shtëpitë e tyre, ndërsa rrugët mbeten të bllokuara.

Më shumë se 5700 persona janë mobilizuar për t'u marrë me këto tre zjarre, njoftuan autoritetet lokale.

Në juglindje të Los Anxhelosit, një zjarr i tretë është përhapur afër një aeroportiku dhe ka djegur gati 89.000 hektarë. Sipas zjarrfikësve lokalë, shtatë persona janë lënduar nga zjarri që shpërtheu të hënën.

Të tre zjarret kanë përkeqësuar valën e të nxehtit që ka prekur rajonin, duke i çuar temperaturat deri në 43 gradë celsius. (Irma)