foto Xinhua
Presidenti i Kinës Xi Jinping u takua të enjten në Pekin me homologun e tij të Botsvanës Mokgweetsi Masisi, që ka ardhur në Kinë për të marrë pjesë në Samitin e Forumit për Bashkëpunimin Kinë-Afrikë (FOCAC) të vitit 2024. Të dy krerët e shtetit shpallën krijimin e partneritetit strategjik ndërmjet të dy vendeve.
Duke vënë në dukje se Kina e Botsvana kanë një miqësi tradicionale dhe i kanë dhënë gjithmonë njëra-tjetrës përkrahje të sinqertë, Xi shtoi se vitin e ardhshëm do të jetë 50-vjetori i vendosjes së marrëdhënieve diplomatike midis dy vendeve. Me këtë rast, Kina dhe Botsvana duhet të përgjithësojnë përvojën e suksesshme të fituar gjatë gjysmë shekulli dhe të vijojnë të jenë partnere të njëra-tjetrës me besim reciprok, zhvillim të përbashkët dhe me lidhjen midis dy popujve. Të dyja vendet duhet të forcojnë më tej bashkëpunimin në fushat e industrisë, bujqësisë, minierave, energjisë së pastër, arsimit, mjekësisë e shëndetësisë etj.
Xi theksoi se aktualisht vrulli i bashkëpunimit kino-afrikan është i fortë dhe kjo jo vetëm u ka sjellë popullit kinez e popujve afrikanë të mira konkrete, por edhe ka nxitur bashkëpunimin ndërkombëtar me Afrikën, duke i krijuar Afrikës kushte të favorshme për zhvillimin dhe lulëzimin. Pala kineze është e gatshme që të përpiqet bashkë me palën botsvanase për të konkretizuar rezultatet e këtij samiti të FOCAC-ut, në të mirë të të dy popujve.
foto Xinhua
Masisi theksoi më tej se pala botsvanase respekton me vendosmëri parimin e "një Kine" dhe beson se populli kinez duhet dhe është plotësisht në gjendje të realizojë bashkimin e vendit. Botsvana është e gatshme që, duke shfrytëzuar rastin e 50-vjetorit të vendosjes së marrëdhënieve diplomatike ndërmjet të dy vendeve, t'i çojë përpara këto marrëdhënie. (Wang Lei/ Artan)
