Foto nga VCG

Paratë nga fondi kryesor për të mbështetur rimëkëmbjen ekonomike të Bashkimit Europian, në vazhdën e pandemisë së Covid-19, rrezikohen mos të arrijnë shpejt në vendet e BE-së, paralajmëroi auditori kryesor i buxhetit dhe politikave të BE-së.

“Në gjysmë të jetëgjatësisë së fondit të ndihmës së Covid-19, vendet e BE-së kishin tërhequr më pak se një të tretën e fondeve të planifikuara”,- tha në një deklaratë Ivana Maletic, një auditore kryesore e rishikimit.

Gjykata Europiane e Auditorëve (ECA) bëri të ditur se ritmi i ulët po rrezikon objektivat e fondit dhe theksoi rreziqet e ngadalësimit të mëtejshëm të përthithjes së financimit dhe mospërfundimit të projekteve.

E fokusuar te Spanja, Sllovakia, Italia dhe Rumania, ECA-ja shqyrtoi nëse fondet ishin dërguar në kohë, disbursuar në mënyrë korrekte dhe nëse vendimet e Komisionit Europian dhe vendeve të BE-së lejonin përdorimin e tyre në kohë.

Institucioni i BE-së për Rimëkëmbjen dhe Rezistencën me vlerë 724 miliardë euro (801 miliardë dollarë), u krijua në shkurt 2021 dhe zgjat deri në gusht 2026.

Për të financuar FRF-në, komisioni merr hua në tregjet e kapitalit dhe i vendos fondet në dispozicion të shteteve anëtare, për financimin e projekteve dhe reformave mjedisore dhe dixhitale, sipas kushteve.

Auditimi zbuloi se ndërsa shkalla e pagesave nga komisioni po përparon, vendet e BE-së mund të mos jenë në gjendje të “thithin fondet në kohë” për projektet e tyre publike përpara se afati i fondeve të përfundojë në vitin 2026.