Foto nga VCG

Shefi për Politikën e Jashtme të Bashkimit Europian, Joseph Borell, deklaroi se shpreson për rihapjen e dialogut me Turqinë pas takimit të rëndësishëm në Bruksel.

Në takim, i cili shënoi herën e parë pas pesë vjetësh ku u ftua një ministër i Jashtëm turk, pati diskutime të gjera midis Borrellit dhe ministrit të Jashtëm turk Hakan Fidan, me një fokus të veçantë në çështjen e Qipros dhe sfidat më të gjera gjeopolitike, shkruan “ATSH”.

Borrell shprehu besimin se ky angazhim mund të jetë hapi i parë drejt zgjidhjes së çështjeve të vjetra dhe përmirësimit të marrëdhënieve dypalëshe.

Ai ripohoi statusin e Turqisë si një vend kandidat për në BE dhe theksoi rëndësinë e ecjes përpara të dialogut konstruktiv.

Pas takimit, Borrell shprehu optimizëm se ky angazhim mund të shërbejë si një katalizator për rigjallërimin e procesit të dialogut mes dy palëve.

Megjithë tonin pozitiv të diskutimeve, Borrell tha se nuk është caktuar një afat specifik për avancimin e procesit të anëtarësimit të Turqisë në BE.

Megjithatë, ai ripohoi se Turqia është një vend kandidat dhe do të vazhdojë të jetë i tillë”, duke treguar gatishmërinë e BE-së për ta mbajtur hapur derën për negociatat e ardhshme.

Fidan, në fjalën e tij pas takimit, theksoi angazhimin e Turqisë për të çuar përpara një agjendë pozitive në marrëdhëniet e saj me BE-në.

Kryediplomati turk theksoi se përparimi mund të arrihet në mënyrë më efektive nëpërmjet një qasjeje konstruktive nga BE-ja, një qasje që nuk varet vetëm nga zgjidhja e çështjes së Qipros.

Fidan theksoi përfitimet reciproke të një qasjeje të tillë, duke sugjeruar se kjo do t’u shërbente interesave të përbashkëta të të dyja palëve. (Irma)