Avione (Foto Panorama)

Ushtria e Polonisë njoftoi se hapësira ajrore e vendit është shkelur, me gjasë nga një dron, pas sulmeve vdekjeprurëse ajrore të kryera nga Rusia ndaj Ukrainës, shkruan “Panorama”.

Më shumë se 100 raketa dhe rreth 100 dronë u lëshuan nga Rusia kundër Ukrainës, përfshirë në rajonet perëndimore ukrainase, duke vrarë të paktën katër persona dhe duke shënjestruar sistemin e energjisë.

Gjatë sulmeve, hapësira ajrore e Polonisë u shkel nga një objekt që hyri nga Ukraina, bëri të ditur gjenerali i Ushtrisë polake.

“Ndoshta po përballemi me hyrjen e një objekti në territorin polak. Ky objekt është konfirmuar nga të paktën tri stacione për gjurmim përmes radiovalëve. Është e qartë se karakteristikat e këtij objekti nënkuptojnë se nuk është raketë, as hipersonike, as balistike e as raketë lundruese”,- tha gjenerali i Ushtrisë polake, Maciej Klisz.

Ushtria polake bëri të ditur se po kryen kërkime për incidentin rreth 30 kilometra larg nga kufiri ukrainas, brenda territorit të Polonisë.

“Ka pasur gatishmëri të lartë për neutralizimin e këtij objekti”,- tha zëdhënësi i Ushtrisë, Jacek Goryszewski. (Irma)