Foto nga VCG

Nisja e shërbimit të dedikuar të anijeve me kontejnerë në Detin e Zi ka rritur efikasitetin e trenave të mallrave Kinë-Europë që nisen nga Xi'an në provincën Shaanxi të Kinës veriperëndimore, të cilët përshkojnë detin Kaspik dhe Detin e Zi nëpërmjet transportit intermodal hekurudhor-detar.

Të martën, treni i parë i mallrave që përfitoi nga ky shërbim i ri, duke transportuar pjesë dhe pajisje makinerie, u nis nga porti ndërkombëtar Xi'an për në Mannheim në Gjermani, bën të ditur “Xinhua”.

Ngarkesa tani ka transport të dedikuar me anije, ndryshe nga mbështetja e mëparshme në transportin publik kolektiv, duke përshpejtuar ndjeshëm logjistikën dhe duke rritur efikasitetin e përgjithshëm, tha Yuan Xiaojun, menaxher i përgjithshëm i Ndërtimit dhe Operacionit të Portit të Tregtisë së Lirë Xi'an.

Periudha e pritjes në Poti, një qytet port në Gjeorgji, tani do të shkurtohet. Treni do të kalojë nëpër vende dhe rajone duke përfshirë Kazakistanin, Gjeorgjinë, Hungarinë dhe Republikën Çeke dhe pritet të arrijë në destinacionin përfundimtar në fillim të shtatorit, duke mbuluar një distancë totale prej 11.300 km.

Xi'an ka trajtuar 2998 trena mallrash Kinë-Europë në shtatë muajt e parë të këtij viti, 28.6 për qind më shumë në bazë vjetore, me vëllimin e ngarkesave që është rritur 19.5 për qind në 3.27 milionë tonë, sipas “China State Railway Group Co., Ltd.”. (Elona)