Kina do të përfshijë objektivat e shkarkimit të karbonit në agjendën kombëtare të zhvillimit ekonomik dhe shoqëror, sipas një plani pune të publikuar të premten.

Plani, i publikuar nga Zyra e Përgjithshme e Këshillit Shtetëror, synon të përshpejtojë ndërtimin e mekanizmave për kontrollin e sasisë totale dhe intensitetin e shkarkimit të karbonit.

Deri në vitin 2025, kapacitetet e vendit në statistika, llogaritje, monitorim dhe matjet e shkarkimit të karbonit do të përmirësohen, sipas planit.

Kina do të krijojë mekanizma që fokusohen në frenimin e intensitetit të shkarkimit të karbonit gjatë periudhës së Planit të 15-të Pesëvjeçar (2026-2030). Pas kulmit të shkarkimit të karbonit, fokusi i mekanizmave do të zhvendoset drejt kontrollit të sasisë totale të shkarkimit, tha plani.

Në plan kërkohen gjithashtu përpjekje për përmirësimin e mekanizmave të planifikimit të shkarkimit të karbonit, për krijimin e sistemit të vlerësimit, për eksplorimin e mekanizmave të paralajmërimit dhe kontrollit për industritë dhe sektorët kyç, si edhe për përmirësimin e mekanizmave të menaxhimit të zvogëlimit të karbonit të ndërmarrjeve.

Kina është angazhuar për qëllimet dyfishe të karbonit, për arritjen e kulmit të shkarkimit të karbonit deri në vitin 2030 dhe për arritjen e neutralitetit karbonik deri në vitin 2060.

Që nga viti 2016, kontrolli i dy treguesve, sasisë totale dhe intensitetit të konsumit të energjisë është bërë një kërkesë e detyrueshme për masat e zhvillimit ekonomik dhe shoqëror nga qeveritë lokale në Kinë

Në një dokument kyç të publikuar kohët e fundit, Kina premtoi vendosjen e mekanizmave të reja për të lehtësuar tranzicionin në kontrollin e sasisë totale dhe intensitetit të shkarkimit të karbonit, në vend të konsumit të energjisë, si pjesë e përpjekjeve për të promovuar zhvillimin e gjelbër dhe shkarkimin e ulët të karbonit. (Wang Lei/ Elona)