Foto nga ATSH

Autoriteti Kombëtar për Sigurinë Kibernetike (AKSK), në bashkëpunim me “CRDF Global”, zhvilloi në Tiranë aktivitetin “Cyber Fortress”.

Ky aktivitet dyditor bashkoi ekspertë të sigurisë kibernetike nga Shqipëria dhe Kosova, në një simulim të incidenteve kibernetike, duke përdorur skenarë të ndryshëm dhe sfidues, shkruan “ATSH”.

Pjesëmarrësit u ndanë në ekipe dhe garuan në zgjidhjen e skenarëve të ndryshëm të incidenteve kibernetike, duke pasur në dispozicion disa zgjidhje teknike dhe një buxhet të caktuar për të mbrojtur infrastrukturën.

Ekspertët u përqendruan në identifikimin e problemeve, vlerësimin e skenarëve dhe diskutimin e zgjidhjeve më të mira.

AKSK-ja, duke organizuar dhe mbështetur aktivitete si Cyber Fortress 2024, ka në fokus jo vetëm përmirësimin e dhe forcimin e kapaciteteve të ekspertëve të sigurisë kibernetike, por gjithashtu promovimin e një bashkëpunimi të fortë ndërkombëtar.

Angazhimi i AKSK-së është i orientuar drejt krijimit të një mjedisi të sigurt dhe të qëndrueshëm kibernetik për të gjithë, duke forcuar lidhjet dhe duke shkëmbyer njohuri me partnerët ndërkombëtarë për të adresuar më mirë sfidat e përbashkëta në këtë fushë. (Irma)