Foto nga China Daily
Shfaqja e artit kinez nxjerr në pah mjeshtërinë e ndërlikuar dhe historinë e gjatë të shkëmbimit. Kukullat tradicionale, qëndisjet, printimet e drurit të Vitit të Ri dhe gdhendjet në dru po krijojnë një atmosferë të fortë kineze në “Musee des Arts Decoratifs” (Muzeun e arteve dekorative), në krahun perëndimor të Muzeut të Luvrit në kryeqytetin francez.
Në një ekran të madh me definicion të lartë, vizitorët mund të shohin aftësitë e transmetuara përmes brezave të artizanëve kinezë që përdoren për të kthyer metalin, drurin, ujin, zjarrin dhe tokën në vepra arti, si dhe mënyrën se si trashëgimtarët modernë kanë nxjerrë një përzierje të përsosur të traditës dhe modernitetit.
Kjo ekspozitë është pjesë e “Exposition Reviving Craft”, një shfaqje e vazhdueshme rreth aspekteve të trashëgimisë kulturore jomateriale dhe dizajnit modern, në kuadër të Vitit të Kulturës dhe Turizmit Kinë-Francë, organizuar nga Ministria kineze e Kulturës dhe Turizmit.
“Shkëmbimi kulturor dhe artistik midis Kinës dhe Francës ka një histori të gjatë.
Kjo ekspozitë synon të prezantojë veprat e mjeshtërve të trashëgimisë kulturore jomateriale dhe stilistëve bashkëkohorë në botë, duke injektuar vitalitet të ri në diversitetin kulturor dhe shkëmbimin ndërkulturor”,- thotë Yang Lan, presidente e “Sun Media Group” dhe bashkëkuratore e ekspozitës.
“Ekspozita ndjek konceptin e pesë elementeve, duke theksuar ndikimin reciprok, transformimin dhe shkrirjen”,- thotë Yang.
Punimet artizanale, të tilla si zbukurimi i filigranit, punimet e drurit, thurja me bambu, prodhimi i çajit, prodhimi i verës, qeramika dhe qëndisja e tekstilit, janë të pranishme për të përfaqësuar ato elemente, shton ajo.
“Duke kombinuar estetikën kineze me multimedian dhe teknologjinë e prezantimit të inteligjencës artificiale, ekspozita krijon një përvojë gjithëpërfshirëse dhe ndërvepruese. Ajo lejon audiencën të kuptojë mjediset natyrore dhe kulturore të trashëgimisë kulturore jomateriale, procesin e krijimit dhe emocionet që ajo mishëron, duke nxitur ndjeshmërinë”,- theksoi Yang.
Në sektorin e metalit, vizitorët mund të provojnë bizhuteri, madje t'i përshtatin ato sipas shijes së tyre duke përdorur inteligjencën artificiale, dhe të mësojnë zdrukthtari tradicionale nëpërmjet demonstrimeve dixhitale në sektorin e drurit.
Ekspozita organizohet nga kompania mediatike në bashkëpunim me “China National Brand” dhe bashkon rreth 100 pjesë nga 40 artizanë dhe stilistë të shquar, si dhe 20 marka dhe institucione pjesëmarrëse. Ajo është një mundësi për vizitorët të shohin kulturën e mrekullueshme mijëravjeçare të Kinës.
Duke ecur në sallën kryesore, seksioni metalik është i pari që bie në sy. Një kurorë me rrjetë ari u jep menjëherë vizitorëve një panoramë të mirë të mjeshtërisë mahnitëse të artit të lashtë kinez të filigranit. Objekti është një kopje e kurorës së perandorit Wanli të dinastisë Ming (1368-1644), që u zbulua në vitet 1950. Kurora është e zbukuruar me dragonj që rrotullohen rreth saj. Ajo përbëhet nga fije ari të hollë, të gjitha të gërshetuara me dorë, duke përdorur një sërë teknikash si prerja, rregullimi dhe saldimi i telit. Nuk ka qepje, nyje të dukshme apo fije të thyera, duke e bërë këtë një mishërim të mjeshtërisë së arit të Kinës.
Yang thotë se kjo pjesë e ekspozitës synon të paraqesë gjallërisht proceset tradicionale të mjeshtërisë së metalit, nga derdhja, gdhendja, punimi dhe filigrani deri te punimet e smaltit, si dhe të shfaqë aftësitë e mjeshtërve kinezë dhe bukurinë e artit të tyre metalik.
Foto nga China Daily
Ajo thotë se i bëri përshtypje kur pa personalisht se si artistët e filigranit mund ta kthejnë një copë metali në një tel të hollë sa një fije floku, një proces që ajo e dëshmoi kur po mësonte për këtë praktikë disa vite më parë.
“Ata kanë aftësinë për të përkulur fijet butësisht rreth gishtave të tyre. Çdo dragua i vogël në kurorë duket i gjallë dhe frymëzues”,- thotë ajo.
Su Dan, zëvendëskurator i Muzeut të Trashëgimisë Kulturore Jomateriale të Kinës, thotë se artizanati unik popullor i argjendit të popullit Miao ka marrë një shkëlqim të veçantë, duke u përdorur në modelimin e kapelave prej argjendi të stileve të ndryshme.
Kapela me lule argjendi e ekspozuar është e zbukuruar me thekë dhe një harabel argjendi. Kur mbajtësi i saj lëviz, harabeli i argjendtë dridhet pak dhe thekët lëkunden butësisht, duke i dhënë kapelës një ndjenjë vitaliteti.
Pika të tjera kryesore përfshijnë Konvergjencën, një vepër arti prej bronzi dhe ari, me figura të gjalla, duke pozuar dorë për dore, që simbolizon jo vetëm lidhjet gjithnjë e më të ngushta dhe të thella mes njerëzve, por edhe një vizion të përbashkët për një jetë më të mirë.
Modeli bazë u krijua duke përdorur printim 3D, i formuar përmes derdhjes precize dhe i dekoruar duke përdorur “electroplating”, që është procesi i përpunimit të metalit.
Në sektorin e tokës, qëndisja është zgjedhur për të përcjellë konotacionin tradicional të elementit të ekuilibrit dhe stabilitetit.
Yao Jianping, një mjeshtër i qëndisjes Suzhou nga dinastia Song (960-1279), ka krijuar një version pëlhure të Mona Lizës, pikturës së famshme nga mjeshtri i Rilindjes, Leonardo da Vinci.
Vepra merr një temperament ëndërrimtar dhe misterioz pasi artisti ka përdorur ngjyra të pasura, për të përcjellë tranzicionet komplekse të dritës dhe hijes së pikturës së vajit.
Si një formë e artit të djegies, qeramika shfaqet në sektorin e zjarrit, duke përfaqësuar entuziazëm.
Forma prej porcelani e rrotullës së “Lantingji Xu” (Parathënie e Koleksionit të Poemave të Pavijonit të Orkideve), nga kaligrafi i shekullit IV, Wang Xizhi, i bën përshtypje audiencës me vëllimin dhe risinë e saj. E punuar nga profesori He Qin i Universitetit të Qeramikës Jingdezhen, ajo integron letrën Xuan të përdorur për kaligrafi me argjilën dhe lustrën, e cila është e derdhur, e gdhendur, e skalitur dhe e pikturuar, duke përcjellë harmoninë e thjeshtësisë dhe kompleksitetit, si dhe ndërveprimin e rusticitetit dhe teknikës. Teknika e gërvishtjes jep një efekt të mirë në sektorin dedikuar për drurin, ndërsa kultura e prodhimit të çajit dhe verës shfaqet në sektorin e ujit.
Wang Yin, këshilltar kulturor i Ambasadës kineze në Francë, thotë se Kina i kushton rëndësi të madhe mbrojtjes dhe transmetimit të trashëgimisë kulturore jomateriale dhe ekspozita tregon arritjet e mbrojtjes së trashëgimisë dhe inovacionit në vend, që është rijetësuar në zanatet e lashta përmes dizajnit bashkëkohor.
Në prag të Olimpiadës së Parisit, ekspozita synon t'u tregojë vizitorëve nga e gjithë bota vitalitetin e trashëgimisë kulturore jomateriale kineze, krijimtarinë e stilistëve kinezë dhe bukurinë e kulturës tradicionale të Kinës, shton Wang.
Sylvie Correard, drejtoreshë ekzekutive e “Musee des Arts Decoratifs”, thotë se ekspozita ka prezantuar artikuj të bukur për audiencën e Parisit, duke u dhënë atyre një mundësi për të zbuluar dhe kuptuar aspekte të ndryshme të prodhimit kulturor kinez.
Ajo bëri të ditur se shpreson të ketë më shumë mundësi në të ardhmen për të punuar me artistë nga Kina.
