Foto nga Xinhua

Fu Cong, përfaqësuesi i përhershëm i Kinës në Kombet e Bashkuara, theksoi të mërkurën se zgjidhja me dy shtete është rruga e vetme për çështjen e Lindjes së Mesme. 

"Projekti i dy shteteve është e vetmja mënyrë e mundshme për të zgjidhur çështjen e Lindjes së Mesme," tha ai në një debat të hapur të Këshillit të Sigurimit të OKB-së mbi Lindjen e Mesme, duke përfshirë çështjen palestineze. 

Fu theksoi gjendjen e vështirë në Gazë, e cila ka vuajtur nga konflikti i vazhdueshëm dhe një krizë serioze humanitare, me mbi 38 000 vdekje të civilëve të raportuara. 

"Bashkësia ndërkombëtare duhet të bëjë të gjitha përpjekjet për të nxitur një armëpushim, për të shpëtuar jetë dhe për të zbutur pa vonesë katastrofën në vazhdim," u shpreh ai. 

Fu dënoi operacionet ushtarake dhe ndëshkimin kolektiv të popullit të Gazës, duke bërë thirrje për një ndalim të menjëhershëm të armiqësive.

"Mbyllja e molit lundrues e ka bërë përsëri të qartë se rrugët e transportit tokësor janë mjetet më të efektshme për të zgjeruar praninë humanitare," u shpreh Fu, duke i kërkuar Izraelit të heqë bllokadën dhe të hapë të gjitha kalimet tokësore, për të siguruar dërgimin e shpejtë dhe të sigurt të ndihmës humanitare.

Ai dënoi gjithashtu sulmet ndaj agjencive humanitare e personelit të tyre, duke kërkuar hetime të thella dhe përgjegjësi.

Përfaqësuesi kinez bëri thirrje për organizimin e një konference paqeje më të madhe e më autoritare, për të përcaktuar afate e plane konkrete për zbatimin e zgjidhjes me dy shtete.