Në Kroaci / foto nga postimet e Zhao Zhaoyi-së në "Weibo"
Aktorja Zhao Zhaoyi është shndërruar nga një personazh i famshëm në një ambasadore kulturore në “reality show”-n e udhëtimeve “Divas Hit the Road”, duke eksploruar peizazhe të ndryshme, kultura dhe rritje personale nëpër destinacione globale.
“Udhëtimi nuk është vetëm relaksim për mua. Ka të bëjë me daljen nga zona ime e rehatisë dhe rizbulimin e vetes, duke u përballur me peizazhe, njerëz dhe kultura të ndryshme”,- tha aktorja 25-vjeçare.
Zhao është pjesë e një grupi të famshëm kinezësh që marrin pjesë në “reality show”-n e udhëtimeve, “Divas Hit the Road”.
Në sezonin e pestë, i cili përfundoi në fillim të këtij viti, grupi shkoi në një udhëtim 23-ditor nëpër Arabinë Saudite, Kroaci dhe Islandë, vende të përfshira në nismën “Një brez, një rrugë”.
Në një sezon të veçantë, që transmetohet aktualisht në “Mango TV”, grupi viziton më shumë miq të Kinës, vende që kanë nënshkruar marrëveshje pa viza ose viza në mbërritje me Kinën, duke përfshirë Singaporin, Indonezinë dhe Francën.
Shfaqja synon t'i ofrojë audiencës këshilla dhe itinerare udhëtimi, duke i caktuar secilit anëtar të grupit rolin e një udhërrëfyesi turistik. Megjithatë, sezoni i pestë prezantoi një kthesë të vogël, duke shtuar mësime të shkurtra dhe kuize për vendet që vizituan.
“Ishte një stil i ndryshëm udhëtimi nga ai që jam mësuar, por ishte një përvojë kuptimplotë. Do t'i kujtoj gjithmonë gjërat që kam mësuar, si gjatësia e urës së Peljesaçit në Kroaci, e cila është 2440 metra”,- tha Zhao.
Në Kroaci / foto nga postimet e Zhao Zhaoyi-së në "Weibo"
Grupi pati mundësinë ta shikonte personalisht Urën e Peljesacit, e cila përshkon gjirin e Malit Ston në detin Adriatik, duke lidhur Kroacinë me gadishullin e Peljesacit.
Ura u hap për trafikun në korrik 2022 dhe, më e rëndësishmja, ajo u ndërtua nga një konsorcium kinez.
Sipas Zhaos, është kjo ndjenjë krenarie si qytetare kineze që i forcon dhe i motivon ata të bëjnë më të mirën si ambasadorë kulturorë.
“Ne jo vetëm po udhëtojmë dhe po xhirojmë një “reality show”, por edhe po përfaqësojmë Kinën ndërsa vizitojmë miqtë e Kinës”,- tha ajo.
Gjatë qëndrimit në Kroaci, grupi pati gjithashtu mundësinë të merrte pjesë në Festën e Mesvjeshtës me stafin e Zyrës së Shkëmbimit Kulturor të Ambasadës Kineze. Teksa bisedonin nën dritën e hënës, ata u befasuan kur mësuan se një nga anëtarët e stafit, i cili dukej se kishte më shumë miq vendas, nuk fliste fare kroatisht dhe as anglishtja e tij nuk ishte shumë e mirë.
Ata thjesht komunikuan, duke përdorur gjuhën e trupit. Pavarësisht pengesës gjuhësore, disa nga miqtë e tij vendas iu bashkuan grupit për darkë. Edhe pse nuk flisnin kinezisht, ata kishin mësuar se ishte një festë e veçantë për popullin kinez dhe donin të dërgonin përshëndetjet e tyre më të mira.
“Kjo e bëri natën edhe më të paharrueshme, të mbushur me dashuri dhe ngrohtësi”, kujton Zhao.
Në Arabinë Saudite/ foto nga postimet e Zhao Zhaoyi-së në "Weibo"
Udhëtimi në Arabinë Saudite gjithashtu e la Zhaon të mahnitur.
“Në Arabinë Saudite, ju mund të zhyteni në natyrë dhe histori, duke vlerësuar bukurinë e saj duke kuptuar se sa të vegjël jemi ne njerëzit në botë”,- tha ajo.
Ndër qytetet që vizitoi grupi, Zhao rekomandon veçanërisht AlUla mbi qytetet më të modernizuara si Jeddah. I ndodhur në shkretëtirë, AlUla është një qytet i lashtë oaz, i njohur për varret e tij 7000-vjeçare dhe formacionet shkëmbore që të lënë pa frymë. Në AlUla ndodhet gjithashtu Hegra, vendi i parë i Trashëgimisë Botërore të UNESCO-s në Arabinë Saudite.
“AlUla përfaqëson më shumë një mikrokozmos të vendit”,- tha Zhao. Megjithatë, ajo pranoi se preferencat personale ndryshojnë dhe ajo e kupton se disa turistë mund të preferojnë më shumë destinacione urbane.
Gjatë udhëtimit të tyre, grupi përjetoi nga afër kulturën dhe zakonet lokale.
“Mësuam se në Arabinë Saudite pothuajse nuk ekzistonte fare përdorimi i dorës së majtë, madje në shumë raste, tabu. Edhe pse vendasit e kuptojnë se ju jeni një i huaj, është respekt të përdorni dorën tuaj të djathtë në çdo moment”,- tha Zhao.
Zhao dhe shokët e saj të famshëm gjithashtu prezantuan kënaqësitë e kuzhinës kineze për banorët vendas. Ndërsa Zhao përmendi se ishte e pamundur të renditeshin të gjitha, ajo rekomandoi me entuziazëm një gatim të veçantë, “hotpot”.
“Ka kaq shumë lloje “hotpot”-i në Kinë: nga stili pikant në Sichuan në tenxheren tradicionale të bakrit të Pekinit dhe vatra kantoneze Dabianlu. “Hotpot”-i është ngulitur thellë në kulturën kineze. Është një gatim që ofron ngrohtësi fizike dhe emocionale, duke i bashkuar njerëzit. Shpesh nxit biseda të sinqerta dhe të hapura rreth tavolinës”,- tha Zhao.
Që nga viti 2019, Arabia Saudite ka lëshuar viza turistike për vizitorët nga 49 vende dhe rajone në mbarë botën dhe Zhao e rekomandon shumë atë si një destinacion turistik, raporton Li Xinran.
Rritje personale
Në Singapor/ foto nga postimet e Zhao Zhaoyi-së në "Weibo"
Udhëtimet e kanë ndihmuar Zhaon të rritet si person. Duke qenë një nga anëtaret më të reja të grupit, kjo ishte përvoja e saj e parë të udhëtonte me kolegë më të vjetër të të njëjtit profesion dhe mësoi shumë prej tyre.
“Një nga mësimet më të vlefshme për mua është t'i jap përparësi peizazhit të një vendi, që të kapem nga dallimet e vogla midis anëtarëve të grupit. Çdo person është unik me perspektivat e veta, kështu që është e natyrshme që opinionet të ndryshojnë”,- tha ajo.
Duke reflektuar mbi përvojën e saj aktuale në xhirimet e sezonit special në vazhdim, Zhao tha se mund të shohë se sa shumë ka ndryshuar.
“Jam bërë më e hapur për mendimet dhe ndjenjat e mia. Gjithashtu kam marrë më shumë përgjegjësi dhe kam qenë më proaktive për të ndihmuar të tjerët”,- tha ajo.
Sipas audiencës, Zhao pati disa pengesa në krahasim me sezonin e mëparshëm. Për shembull, ajo humbi zhytjen në ujë në Islandë, për shkak të frikës nga uji, por kaloi një kohë të mirë në det në Tajlandë. “Nuk isha e fiksuar që të përfundoja atë që nuk kisha bërë sezonin e kaluar. Thjesht m’u duk më e lehtë dhe e natyrshme këtë herë në Tajlandë”,- tha Zhao.
Ajo theksoi gjithashtu se nuk ka një mënyrë të vetme për të përjetuar një vend.
“Si pjesë e Gjeneratës Z, mendoj se jemi të hapur ndaj përvojave të reja dhe vetëshprehjes, të etur për të eksploruar botën në mënyrat tona unike”,- tha aktorja.
Sipas saj, ndonjëherë lënia e diçkaje të papërfunduar në një udhëtim mund të jetë e dobishme, pasi kur i rikthehesh, keqardhja e mëparshme kthehet në një ndjesi dëshire dhe gëzimi për përmbushjen përfundimisht të synimit.
