Klejdi Ngjela me grupin ne nje event 

Klejdi Ngjela është klarinetist nga qyteti i Fierit, i cili lëvron muzikën popullore tradicionale. Ai ka mbaruar studimet për instrumentin e klarinetës në Liceun Artistik të Fierit, por që në fëmijëri është nxitur të mësojë këtë instrument nga i ati i tij klarinetist.  Klejdi ka marrë pjesë në mjaft koncerte brenda dhe jashtë vendit, duke bashkëpunuar me këngëtarë të ndryshëm të muzikës popullore të trevës së jugut. Në kanalin YouTube  ai  ka publikuar një instrumentale popullore me movive të jugut, Në intervistë për Radio Ejani Klejdi tregon për fillimet e tij muzikore, aktivitetet dhe projektet.

Klarinetisti Klejdi Ngjela 

CMG: Si ka nisur rrugëtimi juaj me muzikën popullore dhe pasioni për klarinetën?

Klejdi Ngjela: Rrugëtimi im me muzikën ka nisur në moshën 13 vjeçare, ku në klasë kishim mësim për fyell në një orë muzike, kur mësuesja na tha se cili do të luante më mirë në fyell, do të vlerësohej me notën 10. Mendova se ishte mundësia e vetme për të marrë notën 10 në këtë lëndë. Pastaj shkova në shtëpi dhe bisedova me babain, i cili ka qenë klarinetist dhe më mësoi disa gjëra. Në momentin e parë që ai e pa se unë po mësoja shumë shpejt, më tha se do të bëhesha klarinetist.

Në fakt, ai nuk donte që unë të merrja këtë profesion, sepse në atë kohë ishte moment i vështirë për muzikanët dhe shumë pak prej tyre kishin ngeluar në treg, ngaqë u përhapën masivisht DJ nëpër gëzime familjare. Disa muaj më vonë mora klarinetën që kishte babai në shtëpi dhe fillova të luaja pjesët që kisha mësuar në fyell. Pastaj babai e fshihte klarinetën që unë mos ta gjeja, por që luaja në klarinetë kur nuk ishte ai. Në një festë familjare unë i rashë klarinetës dhe pse me emocione, por babai u habit se ku e kisha mësuar  dhe që nga ai moment më bleu klarinetë të re dhe studioja jo më fshehurazi.

CMG:  ⁠Pra ti e ke trashëguar këtë zanat nga babai ?

Klejdi Ngjela:  Klarinetën e kam trashëguar nga babai im, i cili ka 15 vjet që nuk luan më në klarinetë, por e trashëgoi tek unë këtë instrument.

CMG: Sa orë në ditë studion në këtë instrument?

Klejdi Ngjela: Të bëhesh një instrumentist i mirë të duhen minimalisht 4-5 orë në ditë, pasi unë për disa probleme personale e kam lënë pas dore për tre vjet. Jam kthyer në Shqipëri në vitin 2023 dhe  nuk ndalova së studiuari çdo ditë. Mendoj se po futem mirë në tregun e muzikës popullore të jugut, gjithmonë duke pasur dëshirë për më shumë. Nëse kënaqesh me veten mendoj se është fundi i karrierës së një artisti. Gjithmonë duhet të kesh mangësira në vetvete dhe nuk duhet të kënaqesh.

Klejdi gjate nje eventi 

CMG: Për ty është më e vështirë të luash kaba apo vallet e gëzueshme popullore?

Klejdi Ngjela: Kam patur mundësinë t’i luaj të dyja, por si një myzeqar që jam kabanë myzeqare të muzikës së tabanit duhet ta ruajmë.

CMG: Ke luajtur kaba myzeqare në evente muzikore dhe si ka reaguar publiku?

Klejdi Ngjela: Kam luajtur kaba në një konkurs shkollash kur kam qenë i vogël dhe kam fituar çmim. Gjithashtu publiku ka reaguar në një mënyrë që nuk e prisja kurrë, pasi thonin që kaq i vogël të luaja kaba të vjetër myzeqare. Mendoj se ju duk e çuditshme, pasi shumica e të rinjve pëlqejnë muzikën moderne dhe shumë pak e ruajnë traditën e vjetër të Myzeqesë.

CMG: Në kanalin YouTube ke publikuar një instrumentale me motive jugu. Si është pritur nga artdashësi?

Klejdi Ngjela: Në publikimin e asaj muzike jam bazuar te një  valle e vjetër të titulluar “Nën hijen e ullirit”, që është me motive jugu. Jam munduar ta realizoj sa më të vërtetë, që të kuptohet se kjo është një muzikë tabani e jugut. Kështu që vendosëm ta titullojmë “Motive jugu”, dhe është pritur mjaft mirë nga publiku dhe jam shumë i lumtur për këtë.

CMG: Kush janë këngëtarët që ti ke punuar më së shumti nëpër koncerte apo evente të ndryshme?

Klejdi Ngjela: Një nga këngëtarët e parë që mua më ka mbështetur dhe ndihmuar në pjesën më të madhe të koncerteve në Shqipëri dhe jashtë vendit, Greqi dhe Itali është Agron Zhuga. Kur të gjithë thonin për mua se nuk do të bëhesha instrumentist, Agroni më ka mbështetur shumë. Gjithësesi nuk kemi vetëm një marrëdhënie pune, por ne jemi shumë miq. Pastaj kam patur mundësi të punoj dhe me zonjën e nderuar të Përmetit Donika Pecallari, e cila më ka ndihmuar për koncertet që zhvillohen në Athinë, duke më futur klarinetist në grupin e saj. Gjithashtu janë dhe mjaft këngëtarë të tjerë, që kam shumë respekt sepse janë të talentuar.

CMG: ⁠Cilët janë bashkepunëtorët tuaj në realizimin e materialeve muzikore?

Klejdi Ngjela: Unë jam një person që marr shumë mendime të mira e të këqija, dhe i seleksionoj vetë më vonë. I pari është babai, që edhe pse ka hequr dorë nga muzika, mundohet të më mësojë aq sa informacione ka. Për çdo projekt muzikor timin këngëtari Agron Zhuga është gjithmonë krahu im i djathtë.

CMG: ⁠Si do të jetë ky sezon gëzimesh familjare për ty dhe grupin?

Klejdi Ngjela: Shpresojmë se do të jetë një sezon i mirë, ku deri tani kemi punuar mirë, me seriozitet në punë dhe me njerëz të kënaqur pas pune.

CMG: ⁠Ke qenë për koncerte jashtë vendit?

Klejdi Ngjela: Kam qenë në koncerte në Greqi, ku ka shumë shqiptarë që jetojnë. Kemi bërë koncerte të ndryshme dhe festa familjare. Gjithashtu dhe në Itali kemi bërë të njëjtën gjë.

Klejdi me grupin muzikor 

CMG: Cilat janë projektet muzikore në vazhdim?

Klejdi Ngjela: Do të kem së shpejti projekte të bukura, që shpresojmë shumë t’i pëlqejnë publikut dhe të kënaqen nga muzika jonë.

CMG: Një pershëndetje për dëgjuesit tanë dhe miqtë tuaj.

Klejdi Ngjela: Përshëndes të gjithë dëgjuesit tuaj dhe miqtë e mi. Gjithashtu dua të përshëndes Kristian Priftin, djalin nga Fieri i cili është gjithmonë pas nesh duke na filmuar, dhe duke u munduar t’i bëjë fotot sa më të bukura me profesionalizmin e tij. Falenderoj Radio Ejani për ftesën dhe shpresoj shumë që projektet e tjera t’i prezantojmë në radion tuaj.

Intervistoi: Gazmend Agaj