Ekipi i klubit "Living Root" garon në festivalin e 45-të vjetor të varkave të dragoit të Bostonit të Hong Kongut të dielën. / foto nga “China Daily”

Në lumin Çarls, mijëra njerëz morën pjesë në garat me Varkat e Dragoit në kuadër të festivalit tradicional kinez.

E njohur si ngjarja e parë dhe më e vjetër në Shtetet e Bashkuara që celebron Festën e Varkave të Dragoit, aktiviteti në Boston paraqiti 68 ekipe me rreth 2000 pjesëmarrës.

"Ne duam të promovojmë gara të tilla. Ne duam ta përdorim këtë platformë për të promovuar kulturën aziatike. Njerëzit vijnë këtu për të mësuar, për shkëmbim kulturash ose thjesht për argëtim",- tha Gail Wang, presidente e bordit të Festivalit të Varkave të Dragoit Boston - Hong Kong, për “China Daily”.

Wang tha se dhjetëra vullnetarë për festivalin e 45-të vjetor kanë punuar me zell gjatë vitit të kaluar për të ruajtur traditën, duke ofruar gjithashtu një perspektivë të re për të pranishmit.

"Është shumë e rëndësishme për lidhjet e njerëzve, shkëmbimin e kulturës”,- tha ajo.

Festivali, i quajtur gjithashtu Duanwu  është një festë tradicionale kineze në ditën e pestë të muajit të pestë hënor. Ai përkujton jetën dhe vdekjen e Qu Yuan, një poet dhe politikan gjatë periudhës së shteteve ndërluftuese (475-221 p.e.s).

Me të dëgjuar se shteti i tij, Chu, kishte rënë, ai kreu vetëvrasje duke u mbytur në lumin Miluo.

Legjenda thotë se njerëzit e Chu-së nxituan drejt lumit për ta shpëtuar, por ishin shumë vonë. Kështu, ata hodhën zongzi, ose petët tradicionale të orizit të mbështjella me gjethe bambuje për të penguar peshqit që mos t’i hanin trupin.

Sot, garat me varkë janë kthyer në traditë për kinezët. Rëndësia historike, e kombinuar me argëtimin, konkurrencën dhe atletizmin e garave, e ka shndërruar garën me varkat me dragua në një sport që tërheq pjesëmarrës nga e gjithë bota. Ajo gjithashtu shërben si një portë për njerëzit që të mësojnë më shumë rreth historisë dhe kulturës kineze.

"Më pëlqen të vij në Festivalin e Varkave të Dragoit. Mendoj se është një nga gjërat më të bukura që ndodh në Kembrixh dhe ne jemi shumë të kënaqur që mirëpresim të gjithë vozitësit”,- tha Jason Weeks, drejtor ekzekutiv i Këshillit të Artit i Kembrixhit.

"Ne kemi një komunitet të fortë njerëzish këtu që mbajnë gjallë krijimtarinë. Është mirë që kemi një festival si ky ku të gjithë mund të mblidhemi dhe të festojmë jo vetëm garat dhe aspektet sportive, por edhe aspektet kulturore".

Një rremtar ngriti lopatën e tij në festim pas përfundimit të një gare të dielën / foto nga “China Daily”

Weeks tha se forma dhe dizajni i varkave të dragoit janë pjesë e kulturës dhe artit kinez. “Arti dhe kultura gjithmonë krijojnë mundësinë që ne të bashkohemi me sukses dhe në një frymë feste”, - tha ai.

"Pavarësisht nga politika e ditës apo vështirësitë apo sfidat me të cilat mund të përballemi si vend apo zonë, mendoj se artet gjithmonë na bashkojnë dhe krijojnë kohezion social. Festivali është një nga mënyrat më të mira për t’i bërë të gjitha komunitetet e ndryshme të Kembrixhit së bashku për të festuar kulturën dhe historinë kineze",- tha ai.

Roger Jones po ashtu shijon garat. Ai është autor i “Fitorja Përfundimtare”, një roman mbi emocionet dhe sfidat e garave me varkat me dragua.

“Në vitin 2005 u diagnostikova me një formë të rrallë kanceri dhe disa vjet më vonë fillova të vozisja me një klub me varkë dragoi në Çarleston, Karolina e Jugut”,- tha Jones. "Në vitin 2010 ne vendosëm të krijonim një ekip me njerëz të prekur nga kanceri për të parë nëse mund të konkurronim në nivelin e kampionatit kombëtar".

Ai tha se me të vërtetë nuk mendonte se kishin shumë shanse për të fituar, por ata fituan kampionatin kombëtar.

"Ishte një nder i madh dhe ne fituam të drejtën për të përfaqësuar divizionin tonë në Hong Kong vitin e ardhshëm",- tha ai, por ekipi nuk ishte në gjendje të shkonte sepse disa njerëz ishin të sëmurë dhe disa vdiqën vitin e ardhshëm.

“Libri është një roman i bazuar në këtë ekip dhe atë që bëmë, atë që arritëm dhe frymëzimin që u solli shumë njerëzve dhe shpresën që u dha njerëzve që të mos heqin dorë, të ecin përpara dhe të arrijnë diçka që ata nuk mendonin se mund ta arrinin ndonjëherë”,- tha ai.

Jones tha se ai ka qenë gjithashtu i përfshirë me komunitetin e varkave të dragoit dhe ka mësuar më shumë për kulturën kineze.

"Është një kulturë e mrekullueshme, e bukur. Unë mendoj se e bukura e saj është se 20 njerëz punojnë në unison - kjo është puna ekipore",- tha ai.

Një valle dragoi kryhet në një panair kulturor gjatë festivalit të dielën. / foto nga “China Daily”

Gara me varkë me dragua është tashmë një sport popullor rekreativ.

"Po e shijoj vërtet atë. Është festivali im i parë. Është gara ime e parë me varkë me dragua dhe ka qenë një përvojë e jashtëzakonshme",- tha John Micale, një anëtar i ekipit Boston 1. "Arsyeja kryesore pse po e shijoj është për shkak të diversitetit kulturor të pjesëmarrjes. Sa më shumë të bashkohen njerëz me prejardhje të ndryshme, vende të ndryshme, aq më mirë do të jetë kjo botë".

Hilary Nicholson, 34 vjeç, nga ekipi Tango, që përfaqëson “Tango Therapeutics”, tha se ky është viti i parë që ekipi i saj mori pjesë në garë. “Nuk e kemi bërë kurrë më parë, kështu që ka qenë një përvojë vërtet argëtuese”,- tha ajo. "Të gjithë thjesht kanë qenë jashtëzakonisht mikpritës, jashtëzakonisht mbështetës. Edhe nëse nuk e keni bërë kurrë, ejani ta provoni".

Peter Murphy, 26 vjeç, një tjetër anëtar i ekipit “Tango”, tha se një sfidë e madhe është të përpiqesh të sinkronizosh të gjithë. "Ka qenë vërtet argëtuese të shohësh atë lloj progresi",- tha ai. "Unë kam qenë disi si një vëzhgues. Ka qenë shumë interesante të mësosh për këtë".

 Përgjatë lumit Çarls, ku ndodhet Universiteti i Harvardit, studentët shprehën gjithashtu interesin e tyre për garat e varkave me dragua në "lumin e tyre në shtëpi".

"Ne përfunduam garën tonë të tretë dhe jemi me të vërtetë të lumtur”,- tha Kassandra Diaz, një studente 26-vjeçare japoneze e diplomuar në letërsi, e ekipit të Harvardit.

Gara filloi në orën 7:00 të mëngjesit dhe përfundoi në orën 17:00, me reshje të dendura shiu në mëngjes. "Moti u qetësua. Kishte 20 vozitës në një varkë, ndryshe nga tre deri në gjashtë personat e zakonshëm në një kanoe, kështu që duhet të komunikosh me tjetrin”, - tha ajo.

Disa nga konkurrentët e shumtë që morën pjesë në garat e varkave të dragoit në lumin Çarls gjatë fundjavës/ foto nga “China Daily”

Aric Lu, një 28-vjeçar doktorant i bioinxhinierisë, tha se shumë njerëz e prisnin me padurim garën.

"Është një nga të paktat raste kur i gjithë komuniteti i varkave të dragoit në Boston mblidhet së bashku",- tha ai. “Është gjithmonë bukur të vozisësh, të takosh njerëz të rinj dhe të argëtohesh shumë”.

Ai tha se shëtitja me varkë me dragua në veçanti është një nga ato gjëra që bashkon shumë njerëz.

"Është gjithashtu një mundësi tjetër për shumë njerëz nga shumë kultura të ndryshme që të bashkohen dhe të punojnë së bashku",- tha Lu.

Në festival, studentët kinezë dhe ekipet e varkave me dragua përfaqësojnë me krenari kolegjet e tyre, duke promovuar gjithashtu traditat dhe kulturën kineze.

"Ne jemi shumë krenarë që përfaqësojmë shkollën dhe rajonin tonë",- tha Zhang Lida nga ekipi i Universitetit Sun Yat-Sen. Ajo tha se garat me varka me dragua janë veçanërisht të njohura në Kinën e Jugut.

"Ne jemi shumë krenarë për këtë ngjarje dhe ftuam të gjithë miqtë tanë dhe u treguam atyre origjinën e festës, u treguam atyre historinë e traditës",- tha Wang Yongtao i ekipit Sun Yat-Sen.

Cao Yajun, 24 vjeç, nga Shoqata e të Diplomuarve të Universitetit të Pekinit, tha se garat dhe ngjarjet kulturore në festival janë mënyra të mira për të promovuar kulturën tradicionale kineze.

"Është vërtet emocionuese, me të vërtetë bashkon të gjithë njerëzit dhe të gjithë anëtarët e të diplomuarve të universitetit tonë",- tha ai.

Ekipi i Universitetit të Pekinit, Dreamega, përfundoi i pari në divizionin e tij.