Kina kundërshton fuqimisht planin e BE-së për të vendosur tarifa shtesë për automjetet elektrike kineze
2024-06-13 18:06:22

foto nga VCG

foto nga VCG

Këshilli për Promovimin e Tregtisë Ndërkombëtare i Kinës ka shprehur kundërshtim të fortë ndaj planit të Bashkimit Evropian për të shtuar tarifat për importet e automjeteve elektrike kineze, duke e përshkruar atë si "mjaft të padrejtë" dhe "standard të dyfishtë tipik".

Komisioni Evropian propozoi të mërkurën tarifa shtesë të përkohshme nga 17.4 deri në 38.1 për qind në vendimin e tij paraprak mbi hetimin kundër subvencioneve për automjetet elektrike kineze.

Një zëdhënës i Këshillit për Promovimin e Tregtisë Ndërkombëtare të Kinës theksoi të enjten se KE-ja këmbënguli në vendosjen e tarifave duke mos marrë parasysh faktin që industria evropiane e automjeteve elektrike në fakt nuk pati asnjë dëm, nuk kërkoi ndonjë hetim dhe madje ka shprehur vazhdimisht kundërshtime.

foto nga VCG

foto nga VCG

Hetimi ka shkelur në mënyrë të hapur rregullat e Organizatës Botërore të Tregtisë (OBT), pasi procedura e tij e padrejtë pengoi pjesëmarrjen e prodhuesve kinezë të makinave, tha zëdhënësi, duke shtuar se industritë dhe bizneset kineze do të mbrojnë të drejtat e tyre të ligjshme sipas rregulloreve të OBT-së.

Zëdhënësi e akuzoi BE-në se ka treguar standard të dyfishtë, pasi ka ofruar subvencione të konsiderueshme për industritë e veta të automjeteve elektrike dhe baterive.

Për më tepër, industria kineze e automjeteve elektrike, e integruar thellësisht në zinxhirin global të furnizimit, ka kontribuuar ndjeshëm në zhvillimin e automjeteve elektrike në botë, uljen e lëshimeve të karbonit dhe zhvillimin e gjelbër nëpërmjet bashkëpunimit ndërkombëtar dhe inovacionit teknologjik, tha zëdhënësi.

foto nga VCG

foto nga VCG

Sipas tij, abuzimi i KE-së me rregullat e mëkëmbjes së tregtisë të OBT-së minon parimet e tregut dhe prish qëndrueshmërinë dhe sigurinë e zinxhirit global të furnizimit.

Ndërsa kërkoi anulimin e masave tarifore kundër subvencioneve, zëdhënësi theksoi potencialin e madh për bashkëpunimin Kinë-BE në industrinë e automjeteve elektrike dhe bëri thirrje për dialog për të zgjidhur mosmarrëveshjet, bashkëpunim për përfitim të përbashkët për të ulur lëshimet dhe zhvillim të integruar për të arritur objektivat e gjelbra.   (Fang Xiaoyu/Artan)