Termi kinez chuang hai, i cili përkthehet fjalë për fjalë si “përpjekje përtej detit”, ngjall një narrativë të madhe të emigrimit të guximshëm, veçanërisht në fund të viteve 1980 në Kinë.
Kur ishulli Hainan në Kinën jugore u bë zyrtarisht një provincë, rreth 100.000 njerëz nga të gjitha anët e vendit, të shtyrë nga aspiratat për një jetë më të mirë, kaluan ngushticën Qiongzhou dhe vërshuan në këtë ishull të mbushur plot me premtime dhe mundësi.
Këta sipërmarrës pionierë hapën rrugën për transformimin e Hainanit nga një ishull i largët në një destinacion turistik ndërkombëtar gjatë thuajse katër dekadave të fundit.
Fryma e tyre e guximshme e eksplorimit dhe elasticitetit hodhi themelet për trajektoren e zhvillimit të ishullit.
Një “reality show” i ri, i realizuar në Hainan, kanalizon shpirtin e paepur të chuang hai, duke theksuar rëndësinë dhe rezonancën e tij të qëndrueshme në kontekstin e sotëm.
Programi “This Is My Island” synon të ringjallë këtë frymë të guximshme eksplorimi dhe qëndrueshmërie duke ngarkuar një grup të famshmish që të ndërtojnë një shtëpi eksperimentale nga e para në një ishull të izoluar në provincën Hainan.
Liu Yaowen/foto nga China Daily
Në program marrin pjesë personazhe të njohur të grupmoshave të ndryshme, duke përfshirë këngëtarin 56-vjeçar Cai Guoqing, spikerin 37-vjeçar Yang Di, aktorin 33-vjeçar Hou Wenyuan dhe shtatë anëtarët e grupit të djemve “Teens in Times”. Të ngarkuar me sfidën e vetëmjaftueshmërisë, pavarësisht burimeve të pakta, atyre u kërkohet të nisin një udhëtim eksplorimi dhe të bashkëjetojnë me njëri-tjetrin në një zonë të shkretë.
Kryeproducenti i shfaqjes, Gu Chaofeng, thekson se pavarësisht nga mosha, individët nuk duhet të kenë frikë nga sfidat dhe duhet të guxojnë të dalin nga zonat e tyre të rehatisë për të sfiduar veten. Në këtë program, çdo pjesëmarrës e bën me guxim pikërisht këtë.
“Ne duam të përcjellim frymën e chuang hai dhe të lejojmë më shumë të rinj të kuptojnë atë periudhë të historisë dhe të praktikojnë këtë frymë pioniere në jetën e tyre”,- thotë ai.
Ai thekson se ky nuk është vetëm një “reality show” për mbijetesën në një zonë të shkretë, por është një program eksplorimi i ishullit.
Përveç ndërtimit të strehimoreve dhe kërkimit të ushqimit në një ishull të shkretë, pjesëmarrësit angazhohen në garat e ndërtimit të varkave duke përdorur materialet e gjetura në ishull. Ata gjithashtu i nënshtrohen trajnimit ushtarak, duke nënvizuar rëndësinë e Marinës dhe madje organizojnë një koncert në perëndim të diellit në ishull.
Shfaqja është filmuar në gadishullin Shenzhou në pjesën juglindore të provincës Hainan.
Hou Wenyuan/foto nga China Daily
“Gadishulli Shenzhou duket një vend veçanërisht tërheqës. Është gjysmë i zhvilluar dhe gjysmë i pazhvilluar. Ai kalon nga vendpushimet turistike plot aktivitet në ishuj të shkretë dhe zona detare të paeksploruara thjesht duke u ngjitur mbi një mal. Është një vend i përsosur për të filmuar këtë program”,- thotë Gu.
Ekipi i “reality”-t ka bashkëpunuar edhe me revistën kineze “National Geography”, e cila sjell ekspertë për të ofruar njohuri të dobishme mbi mbijetesën në zona të shkreta, gjeografinë dhe botanikën gjatë programit. Ekspertët përfshijnë Zhou Weiqiang, një aventurier i natyrës së shkretë, i cili shpesh cilësohet si Bear Grylls-i i Kinës, dhe fotografi i natyrës dhe entuziast i bimëve Zhong Xin.
Në episodin e parë, i shfaqur në platformën e transmetimit video “Youku”, pjesëmarrësit u ndanë në grupe dhe ndërtuan strehimore në ishull duke përdorur materiale të tilla si druri dhe gjethet e palmës.
Ekspertët e lartpërmendur më pas dhanë këshilla konstruktive për përmirësimin e strehimoreve, duke rritur aftësinë e tyre për t'i bërë ballë shiut, për të mbajtur nxehtësinë dhe për të larguar insektet.
Përveç kësaj, pjesëmarrësit bënë pajisje për filtrimin e ujit duke përdorur rërë, qymyr dhe guralecë.
Ata demonstruan gjithashtu zgjuarsi duke përdorur pjesën metalike të letrave të çamçakëzit për të lidhur terminalet e baterive, duke krijuar një qark të shkurtër për të gjeneruar nxehtësi të mjaftueshme për të ndezur një zjarr.
Ma Jiaqi/foto nga China Daily
“Aspekti më i këndshëm i pjesëmarrjes në programe në natyrë është se çdo përvojë është unike dhe duhet të përballeni me shumë pasiguri”, thotë këngëtari-aktor 53-vjeçar nga Tajvani, Nicky Wu, i cili është një nga pjesëmarrësit e shfaqjes.
Nicky Wu/foto nga China Daily
“Kur ka diell, ndoshta mund të përdoret një pasqyrë për të ndezur një zjarr, por në ditët me shi, i gjithë druri mund të jetë i lagësht dhe vetëm ndezja e zjarrit mund të na çmendë. Megjithatë, të gjitha këto janë përvoja të çmuara jetësore”,- thotë ai.
Yang shton se përvojat po e mësojnë atë mos të marrë të mirëqenë gjithçka që normalisht ka në jetën e përditshme.
Si pjesëmarrësi më i madh, Cai thotë se shfaqja i ka dhënë atij një respekt të ri për të rinjtë.
“Shtatë anëtarët nga “Teens in Times”, të gjithë të lindur pas vitit 2000, u rritën në epokën më të pasur të vendit. Mendova se ata mund të ishin mësuar me rehati dhe urrejnë vështirësitë, por ata përmbushën çdo angazhim të lodhshëm pa u ankuar. Besoj se duke na parë të fillojmë nga e para në një mjedis të tillë do të frymëzojmë më shumë të rinj”,- tha ai.
