Aktori i operës së Pekinit, Hu Wenge, luajti rolin e Yuji-së në pjesën "Lamtumirë konkubina ime", një nga pjesët më të përhapura të interpretuara nga masteri i ndjerë i operës së Pekinit Mei Lanfang, në Mars në Pekin / foto nga "ChinaDaily"
Mjeshtri legjendar i Operës së Pekinit, Mei Lanfang (1894-1961) është një emër i njohur në Kinë, falë kontributit të tij në art. Ai ishte një nga artistët e parë kinezë që prezantoi Operën e Pekinit në një audiencë jashtë vendit dhe shumë nga repertorët e tij klasikë luhen ende sot.
Opera e Pekinit, e njohur edhe si jingju, u njoh si një trashëgimi kulturore jomateriale e njerëzimit nga UNESCO në vitin 2010. Ajo bashkon disiplina të ndryshme si kënga, vallëzimi, artet marciale dhe akrobacia.
Me rastin e 130-vjetorit të lindjes së Meit, një sërë eventesh artistike u njoftuan muajin e kaluar në kryeqytetin kinez nga Kompania Teatrore Jingju e Pekinit.
Po ashtu, shënohet edhe 90-vjetori i lindjes së Mei Baojiu (1934-2016), djalit të Mei Lanfang, një trashëgimtar kyç i artit të tij.
Masteri i ndjerë i operës së Pekinit Mei Lanfang luajti rolin e Yuji-së në pjesën "Lamtumirë konkubina ime" / foto nga "ChinaDaily"
Sipas Zhu Jia, zëvendësdrejtor i Kompanisë Teatrore Jingju të Pekinit, stili i Operës së Pekinit i Mei Lanfang u bë i njohur si meipai, ose Shkolla Mei, dhe së bashku me sistemin rus Stanislavsky (që shfrytëzon kujtesën emocionale) dhe sistemin gjerman Brecht (që thekson kujtesën sugjestive) formuan tre sistemet performuese të botës.
“Kur flasim për Operën e Pekinit, Mei Lanfang është një emër që nuk mund të anashkalohet. Kontributi i tij në art, inovacioni i tij në zhvillimin e formës së artit dhe suksesi që arriti në promovimin e artit kinez në botë do të mbahet mend gjithmonë”,- deklaroi Zhu.
Kompania bashkëpunon me kompanitë e operës në të gjithë vendin, të tilla si Kompania e Teatrit “Shanghai Jingju” dhe Kompania e Teatrit Tianjin Jingju, pasi filloi të vërë në skenë më shumë se 60 shfaqje nga marsi deri në tetor, në disa qytete, duke përfshirë Pekinin, Tianjin, Shangain dhe Nanjing, në provincën Jiangsu.
10 shfaqjet e para u vunë në skenë në Pekin nga fundi i marsit deri më 6 prill, me yje të Operës së Pekinit, si Fan Yuyuan, Hu Wenge dhe Zhang Huifang, të cilët luajtën pjesë klasike të përshtatura dhe interpretuara nga Mei Lanfang, duke përfshirë “Bawang Bieji” (Lamtumirë konkubina ime), “Taizhen Waizhuan” (Legjenda e Yang Yuhuan dhe “Mu Guiying Guashuai” (Mu Guiying: Marrja e Komandës).
Përveç shfaqjeve të drejtpërdrejta, eventi homazh përfshin gjithashtu një ekspozitë që shfaq më shumë se 70 kostume, të përdorura nga Mei Lanfang dhe Mei Baojiu, e cila do të mbahet në “Capital Museum” dhe në “National Centre for the Performing Arts” në Pekin, nga gushti deri në tetor.
Artisti i ndjerë i operës së Pekinit Mei Baojiu (djathtas) dhe Hu Wenge interpretuan pjesën "Shpata në kozmos", tjetër pjesë klasike e operës së Pekinit / foto nga "ChinaDaily"
Mei Lanfang lindi në Pekin në një familje të Operës së Pekinit. Ai filloi të studionte Operën e Pekinit në moshën 8-vjeçare dhe debutoi në skenë në moshën 11-vjeçare.
Ai u specializua në interpretimin e roleve nandan, ku burrat luajnë personazhe femra, një praktikë e përdorur në kohët kur gratë ndaloheshin të dilnin në skenë. Në moshën 13-vjeçare, Mei Lanfang iu bashkua Xiliancheng, atëherë trupa më e madhe e Operës së Pekinit, dhe me shfaqjet jo vetëm në Pekin, por edhe në Shangai, Mei Lanfang shpejt fitoi një reputacion kombëtar.
Ai bëri turne në Japoni në vitet 1919, 1924 dhe 1956. Në vitin 1930, ai bëri turne në Shtetet e Bashkuara të Amerikës për rreth dy muaj, duke dhënë shfaqje në Nju Jork, Uashington dhe San Francisko, ndër të tjera.
Në vitin 1935, ai performoi në ish-Bashkimin Sovjetik dhe në të njëjtin vit bëri turne në Europë.
Kulmi i performancës nandan ishte në gjysmën e parë të shekullit XX, kur Mei Lanfang, Shang Xiaoyun (1900-1976), Cheng Yanqiu (1904-1958) dhe Xun Huisheng (1900-1968) themeluan katër stilet e ndryshme të interpretimit të Mei, Shang, Cheng dhe Xun. Secili stil është ruajtur, mësuar dhe interpretohet edhe sot nga nxënësit e tyre.
Mei Baojiu, djali i nëntë i Mei Lanfang, filloi të mësonte Operën e Pekinit në moshën 10-vjeçare dhe, ashtu si babai i tij, ai ishte i njohur për interpretimin e roleve nandan. Kur ishte 13 vjeç, Mei Baojiu bëri debutimin e tij në skenë në Shangai, përpara se të fillonte turneun me trupën e Operës së Pekinit të babait të tij Mei Lanfang kur ai ishte 16 vjeç.
Mei Baojiu mori kryesimin e trupës pasi babai i tij vdiq në vitin 1961.
Hu Wenge/ foto nga "ChinaDaily"
Hu kujton se kur ata performuan në Nju Jork, në vitin 2014, një fanse e Mei Lanfang erdhi në shfaqjen e tyre dhe i dha Mei Baojiu një letër, një partiturë muzikore të Mei Lanfang kur ai bëri turne në SHBA në vitin 1930.
“Ishte një moment shumë prekës kur pashë që partitura e vjetër e muzikës ishte kujdesur aq mirë. Kjo dëshmon gjithashtu se arti i Mei Lanfang është i përjetshëm dhe i ndarë nga njerëz nga e gjithë bota”,- tha Hu.
Sipas Feng Gang, zëvendësdrejtor i “Shanghai Jingju Theatre Company”, Mei Lanfang bëri debutimin e tij në Shangai kur ishte 19 vjeç dhe, në vitin 1932, ai u transferua në Shangai nga Pekini për shkak të Luftës së Rezistencës Kundër Agresionit Japonez (1931-1945).
Mjeshtri i Operës së Pekinit u tërhoq nga teatri nga viti 1941 deri më 1945-n. Në tetor 1945, ai rifilloi karrierën e tij të aktrimit me shfaqje në Shangai.
“Performancat e tij të kthimit në Shangai ishin një sensacion. Ne jo vetëm që duam të festojmë artin e madh të Mei Lanfang, por edhe patriotizmin e tij”,- thotë Feng, duke shtuar se mjeshtri i Operës së Pekinit mësoi gjithashtu Operën Kunqu dhe futi artin e formës tradicionale kineze të operës 600-vjeçare në Operën e Pekinit.
Më 31 maj 1961, Mei Lanfang performoi në Pekin “Mu Guiying: Marrja e Komandës”, e cila rezultoi të ishte shfaqja e tij e fundit në skenë, duke përfunduar një karrierë legjendare që përfshin mbi 60 vjet.
