Foto nga Xinhua

Forumi i Zhvillimit të Kinës 2024, një forum ndërkombëtar i nivelit kombëtar që mbahet çdo vit pas dy sesioneve, filloi të dielën në Pekin, me synimin për të promovuar dialogun dhe bashkëpunimin midis Kinës dhe komunitetit global për zhvillimin e qëndrueshëm, njofton “CGTN”.

Forumi dyditor ka tërhequr më shumë se 110 pjesëmarrës, duke përfshirë drejtues nga Banka Botërore dhe Fondi Monetar Ndërkombëtar (FMN), drejtues të lartë të korporatave dhe studiues kryesorë. Siç njoftoi organizatori i forumit të premten, ata janë mbledhur për t'u përfshirë në diskutime të thella mbi temën “Zhvillimi i vazhdueshëm i Kinës”.

Në fjalimin e tij, kryeministri kinez, Li Qiang, theksoi angazhimin e Kinës për të krijuar mundësi për investitorët globalë përmes një qasjeje gjithëpërfshirëse që përfshin politikën makroekonomike, urbanizimin, përmirësimet industriale dhe tranzicionin e gjelbër.

Gjatë forumit, Zheng Shanjie, kreu i Komisionit Kombëtar të Zhvillimit dhe Reformës, deklaroi se Kina planifikon të nxisë përmirësimin e pajisjeve në shtatë sektorë: industria, bujqësia, arsimi, transporti, ndërtimi, kultura dhe turizmi dhe kujdesi shëndetësor. Kjo nismë pritet të krijojë një treg prej mbi 5 trilionë juanë (700 miliardë dollarë) në shkallë.

Me një paketë gjithëpërfshirëse reformash pro tregut, Kina mund të rritet ndjeshëm më shpejt se skenari i status quo-së, tha drejtoresha menaxhuese e FMN-së, Kristalina Georgieva.

Axhenda e vitit përfshin edhe neutralitetin e karbonit, inteligjencën artificiale, kujdesin shëndetësor dhe transformimin digjital, duke demonstruar potencialin e gjerë për zhvillimin e ardhshëm të Kinës.

Që nga fillimi i tij në vitin 2000, forumi është bërë një platformë jetike për hapjen e vendit ndaj botës, duke nxitur bashkëpunimin dhe shkëmbimet ndërkombëtare. (Fatosi)