Një qendër mediatike u vu në përdorim të martën në Pekin, e gatshme për t'i shërbyer fluksit të reporterëve të huaj që do të raportojnë lidhur me “dy sesionet” vjetore të organeve më të larta ligjvënëse dhe këshillimore politike të vendit.
“Dy sesionet", përkatësisht sesioni i dytë i Komitetit të 14-të Kombëtar të Konferencës Konsultative Politike të Popullit Kinez (KKPPK) dhe sesioni i dytë i legjislaturës së 14-të të Asamblesë Kombëtare Popullore (AKP), do të fillojnë përkatësisht më 4 dhe 5 mars.
Qendra, e vendosur në Hotelin e Qendrës Mediatike në Pekin, tha në një njoftim për shtypin të martën se mbi 3 000 gazetarë janë regjistruar për të raportuar, duke përfshirë rreth 1 000 nga Hong-Kongu, Makaoja, Tajvani dhe të huaj.
Foto nga VCG
Qendra është e pajisur me një sallë konferencash shtypi dhe disa dhoma intervistash, të cilat mediat janë të mirëpritura t'i përdorin.
"Versionet digjitale të dokumenteve kryesore të konferencës do t'u ofrohen gazetarëve, që ata të mos kenë nevojë të presin në radhë të gjata për t'i marrë," thuhet në njoftim, duke shtuar se do të ketë vende për kryerjen e intervistave në hotelet ku qëndrojnë deputetët e AKP-së dhe anëtarët e Komitetit Kombëtar të KKPPK-së.
Menjëherë pasi qendra mediatike u hap të martën në mëngjes, korrespondentët dhe videografët, duke përfshirë ata nga Televizioni Kabllor i Hong-Kongut dhe Televizioni Satelitor “Phoenix”, hynë në qendër për të parë mjedisin dhe shkëmbyen informacione kontakti me kolegët.
Një anëtar i stafit në qendër tha se kolegët e tij kishin marrë një numër telefonatash nga gazetarë të huaj që kërkonin ndihmë lidhur me regjistrimin ose kërkonin informacion shtesë për dy sesionet.
“Gazetarët zakonisht duan më shumë informacion se ai që jepet zyrtarisht”, shtoi ai.
Salla shumëmediale në katin e dytë është kthyer në një sallë konferencash shtypi, me më shumë se 150 vende përballë një podiumi me tetë karrige dhe një sfond blu. Në pjesën e pasme të sallës janë vendosur stenda për videografët.
Në kafenenë e qendrës mediale kishte ushqime e pije falas, si ëmbëlsira dhe kafe. Gjatë dy sesioneve të këtij viti, mediat mund të bëjnë intervista ballë për ballë dhe të raportojnë nga vendi i zhvillimit të sesioneve plotësisht si në nivelet para pandemisë.
Punëtorët pastronin dyshemetë ndërsa të tjerë testonin makineritë e skanimit në pikat e kontrollit të sigurisë dhe vendosnin rafte xhami që do të mbushen me pulla përkujtimore dhe kartolina të emetuara nga Posta e Kinës.
Foto nga VCG
Një korrespondente televizive nga Rajoni i Posaçëm Administrativ i Hong-Kongut, e cila dha emrin e saj vetëm si Emily dhe që punonte me një laptop në kafene pasi kishte kryer disa filmime, tha se është hera e parë që raporton për dy sesionet. "Shumë gazetarë nuk kanë ardhur ende," tha ajo, "por ndoshta brenda pak ditësh, vendi do të jetë i mbushur plot." (Ziqi)
