foto nga CFP
Konkurrenca në sektorin e serialeve minidrama në internet në rritje të shpejtë në Kinë po merr hov pasi platformat kryesore të videove të shkurtra kanë intensifikuar përpjekjet për të ofruar stimuj në para dhe mbështetje për të dhënat për krijuesit e përmbajtjes, në përpjekje për të përmirësuar prodhimin e përmbajtjeve video me cilësi të lartë dhe për të nxitur fitime më të mëdha.
Platforma e shpërndarjes së videove “Douyin”, e cila është në pronësi të gjigantit të teknologjisë kineze “ByteDance”, bëri të ditur se do të investojë 5 milionë juanë (694.900 dollarë) për të mbështetur zhvillimin e minidramave premium, me çdo episod që zgjat vetëm dy ose tre minuta. Sipas “Douyin”, më shumë se 500 minidrama kishin regjistruar mbi 100 milionë shikime secila deri në fund të vitit 2023, me 12 prezantime të tilla që grumbulluan më shumë se 1 miliard shikime. Platforma do të bashkëpunojë me kompanitë profesionale të filmit dhe televizionit, agjencitë e rrjeteve shumëkanalëshe (MCN) dhe krijuesit individualë në fushat e shkrimit të skenarit, prodhimit të përmbajtjes dhe operacioneve.
Krahasuar me serialet tradicionale televizive, minidramat shfaqin rrëfim me ritme të shpejta, kthesa të shumta të komplotit, tema më të thjeshta gjithëpërfshirëse dhe marrëdhënie karakteresh që janë më afër përvojave të jetës së përditshme të shikuesve. Ato po fitojnë popullaritet në rritje mes shikuesve më të rinj që dëshirojnë të gjejnë kohë për t'u çlodhur nga skenarët stresues të punës.
foto nga CFP
Platforma kineze e videove të shkurtra “Kuaishou” ka njoftuar planet për të nxjerrë më shumë se 200 minidrama në vitin 2024, për të ofruar më shumë kapital dhe trafik të dhënash për krijuesit e përmbajtjes, si dhe për të rritur mbështetjen për minidramat me pagesë, në përpjekje për të përmirësuar cilësinë e prodhimit të ofertave dhe për të rritur përfitimet.
Chen Yiyi, zv.president i “Kuaishou” dhe kreu i departamentit të kulturës dhe argëtimit të kompanisë, tha se përdoruesit mesatarë aktivë ditorë që shikonin minidrama në këtë platformë arriti në 270 milionë vitin e kaluar dhe numri i shikuesve që shikonin mbi 10 episode të miniserialeve dramatike çdo ditë u rrit me 52.6 për qind në baza vjetore në 94 milionë. Numri i krijuesve të përmbajtjes në “Kuaishou” i tejkaloi 100.000 deri në fund të vitit 2023.
Kompania ka lançuar gjithashtu mini drama me pagesë në aplikacionin e saj, ku përdoruesit mund të zgjedhin të blejnë çdo episod ose drama të tëra. Numri i përdoruesve që paguajnë për drama u rrit gati 10 herë, ndërsa vlera bruto e minidramave me pagesë u rrit rreth 20 herë, tha ai. Tregu i minidramave në Kinë pritet të ketë rritje të fuqishme gjatë viteve të ardhshme. Konsulenca e tregut “iiMedia Research” bëri të ditur se të ardhurat nga industria e minidramave në internet në Kinë ishin 37.39 miliardë juanë në vitin 2023, duke u rritur me 267.65 për qind në baza vjetore. Shifra pritet të arrijë në afro 100.68 miliardë juanë në vitin 2027. Ma Shicong, analist në konsulencën e internetit “Analysys”, me bazë në Pekin, tha se konsumatorët e rinj, koha e lirë e të cilëve priret të jetë më e fragmentuar dhe sporadike, po shfaqin entuziazëm të madh për miniserialet dramatike.
“Zhvillimi i shpejtë i minidramave, të cilat grupohen në zhanre të ndryshme, është i favorshëm për pasurimin e ekosistemit të përmbajtjes së platformave të videove të shkurtra, duke rritur angazhimin e përdoruesve dhe duke joshur një klasë të re përdoruesish”,- tha Ma.
foto nga CFP
Duhet të bëhen më shumë përpjekje për të eksploruar modele më të larmishme të fitimit të parave, duke përfshirë reklamimin, përmbajtjen me pagesë dhe tregtinë elektronike në transmetim të drejtpërdrejtë, tha Ma, duke shtuar se prezantimi i mëtejshëm i përmbajtjes me pagesë do të gjenerojë më shumë fitime për sektorin e minidramave.
Chen Jiaqi, një redaktore 27-vjeçare e revistës së modës në Pekin, pëlqen të shikojë minidrama në kohën e saj të lirë në “Douyin”. Ajo tha se linjat e thjeshta të tregimeve, dialogët qesharakë dhe komplotet i shkojnë për shtat shijeve të saj dhe ajo është tërhequr nga narrativa emocionuese dhe përfundimet befasuese.
Zhang Yi, drejtor ekzekutiv dhe analist kryesor në “iiMedia Research”, tha se cilësia aktuale e serialeve minidrama ndryshon në mënyrë të konsiderueshme.
“Përdoruesit e videove të shkurtra shfaqin një kërkesë në rritje për përmbajtje me cilësi të lartë, ndërsa mbikëqyrja e vendit mbi industrinë e minidramave do të jetë gradualisht më e rreptë, gjë që do të nxisë më tej zhvillimin e rregulluar dhe të shëndetshëm të tregut të minidramave”. Një raport nga Konventa Kineze e Internetit për Audio dhe Video tregoi se më shumë se gjysma e fansave të videove të shkurtra kishin parë minidrama ose shfaqje të ndryshme që zgjasin më pak se tre minuta, ndërsa përdoruesit e moshës nën 19 vjeç përfaqësonin 57.9 për qind të totalit të shikuesve të videove të shkurtra.
