Pasi u ndezën dritat, një interpretues i ri doli në skenë,duke u vendosur në qendër të vëmendjes në sfondin e një perdeje të kuqe. Duke mbajtur mikrofonin me besim, ai filloi të interpretonte humorin e tij në dialektin tibetian, duke shkaktuar të qeshura dhe duartrokitje nga publiku.

Stand-up komedia e Nyanzin Drakpa u vu në skenë në Lhasa, kryeqendra e Rajonit Autonom Xizang  të Kinës jugperëndimore.

foto nga VCG

22-vjeçari, aktualisht ndjek studimet në një universitet në Pekin dhe ka krijuar një ekip komedie të quajtur Shwow në Lhasa, me të cilin kënaq publikun gjatë pushimeve të verës dhe dimrit.

“Shpresojmë që çdo tibetian që e do stand-up komedinë të vijë me pritje dhe të largohet me buzëqeshje”, tha ai.

Nyanzin Drakpa i lindi ideja  për të bërë stand-up komedi tre vjet më pare, kur ndoqi një shfaqje në Pekin.

"Komedia kishte të bënte me të moshuarit që ushtroheshin në parqe dhe më kujtuan skena të ngjashme qesharake që kisha hasur në një park në Lhasa," kujton ai, duke shtuar se vendimi i tij për të performuar stand-up komedi në dialektin tibetian mori mbështetje të menjëhershme nga babai i tij. 

foto nga VCG

Në fakt, prirja e tij drejt stand-up komedisë është ndikuar shumë nga babai i tij, Dorje Drakpa, një komedian i njohur në Xizang, i cili mori pjesë në gala rajonale për Vitin e Ri tibetian.

“Kur isha fëmijë, shpesh shkoja  së bashku me babin tim në shfaqje të ndryshme, duke e parë atë të sillte gëzim tek publiku”, tha Nyanzin Drakpa.

Kur Nyanzin Drakpa dhe shokët e tij të shkollës së mesme themeluan ekipin Shwow në vitin 2021, komedia stand-up ishte ende një formë arti relativisht e panjohur  në Xizang.

Për habinë e tyre, shfaqja e tyre e parë e organizuar pa pagesë në një kafene tërhoqi afro 300 njerëz, gjashtë herë më shumë se kapaciteti i vendeve, madje pa asnjë reklamë.

"Disa njerëz qëndronin në tavolina dhe banakun e barit dhe ndiqnin performancën”, tha ai.

foto nga VCG

Me sensin e tij unik të humorit dhe vëzhgimit të mprehtë, Nyanzin Drakpa kapi detajet e jetës, të tilla si përvojën e tij të gjobitjes nga një polic rrugor, dhe i ktheu ato me mjeshtëri në  interpretime komike.

Ai këmbënguli të performonte në dialektin tibetian dhe për të përmirësuar aftësinë e tij gjuhësore, ndoqi klasat e trajnimit jashtëshkollor  në këtë dialekt gjatë pushimeve të tij.

"Disa nga skeçet tona janë të lidhura me kulturën tibetiane, kështu që tregimi i tyre në dialektin tibetian do ta bëjë më të lehtë për publikun ta kuptojë  ," tha ai.

Mes peizazhit të lulëzuar kulturor dhe artistik të Xizang viteve të fundit, janë shfaqur shumë krijime të shquara letrare dhe artistike. Stand-up komedi tibetiane, si një formë arti në zhvillim, po fiton popullaritet dhe është bërë një burim i rëndësishëm argëtimi për popullsinë  tibetiane, veçanërisht për të rinjtë.

Tashi Tseten, një student universiteti, tha se Nyanzin Drakpa ndërthur me mjeshtëri temat tradicionale me një qasje bashkëkohore, të cilën ai e sheh shumë të këndshme. “Stand-up komedia është bërë një mënyrë për mua për të lehtësuar presionin e studimit”.

Deri më sot, rreth 30 komedianë kanë performuar si pjesë e ekipit të Shwow, me të ardhurat e secilës shfaqje që tejkalojnë 30,000 juanë (rreth 4,225 dollarë amerikanë) gjatë festës së Vitit të Ri tibetian. Në fillim të këtij viti, Nyanzin Drakpa organizoi një seri shfaqjesh në qytetin e tij të lindjes Shannan.

Në vazhdim, Nyanzin Drakpa planifikon të ngarkojë videot e performancës me titra në Mandarin për të arritur një audiencë më të gjerë.

"Shpresoj se shfaqjet tona mund të shkojnë përtej pllajës dhe të përhapin gëzim në më shumë njerëz," tha ai.