I stolisur me shirita të kuq dhe me karaktere kineze në dritare, një autobus elektrik publik u shndërrua në një autobus dasme.

"Autobusi i dasmës është mjaft i gjerë, për të akomoduar familjen dhe miqtë e mi. Ne u ulëm së bashku dhe kaluam një kohë të këndshme,  duke luajtur lojëra gjatë rrugës",- tha e sapomartuara Zhang Qingqing, e cila mori me qira një autobus për transportin e saj ditën e dasmës në qytetin Nanchang, kryeqendra e provincës Jiangxi të Kinës Lindore.

Në Kinë, ka qenë një praktikë e zakonshme që çiftet të punësojnë një flotë prej rreth 10 sedanësh në ditën e tyre të madhe për t'i transportuar ata dhe të ftuarit e tyre në vendin e dasmës.

“Do të kushtonte shumë dhe familja dhe miqtë e mi duhet të shpërndaheshin në makina të ndryshme, ku është e lehtë të ndihesh i mërzitur dhe i vetmuar”,- tha Zhang.

foto: Xinhua

Para dasmës, Zhang zbuloi, përmes një platforme të mediave sociale, se marrja me qira e një autobusi dasmash ishte në modë mes shumë të rinjve të porsamartuar.

Fotot e autobusëve të ndryshëm të dasmave të shpërndara nga përdoruesit e rrjetit ia rrëmbyen zemrën.

"Kjo rezonon me shijen tonë si të rinj. Prindërve dhe miqve tanë u pëlqyen idetë tona",- tha Wang Yu'an, bashkëshorti i Zhang.

Çifti rezervoi një autobus martese përmes ofruesit të shërbimit me qira të autobusëve të dasmave, “Jiangxi Nanchang Public Transportation Group Co., Ltd.”

Në prag të martesës, çifti mbërriti në parkingun ku ishte parkuar autobusi dhe së bashku me miqtë e tyre e dekoruan me fjongo dhe tullumbace. Të gjithë u ndjenë të përfshirë, tha çifti.

foto: VCG

Sipas grupit të transportit publik “Nanchang”, që nga fillimi i shërbimit me qira të autobusëve të dasmave në mars të vitit të kaluar, rreth 100 çifte kanë rezervuar autobusë për dasmat e tyre dhe pothuajse të gjithë ishin të rinj të lindur pas vitit 1995.

Xu Rong, asistent i menaxherit të përgjithshëm të grupit të transportit publik “Nanchang”, tha se kur merren me qira autobusët, sigurohen edhe shoferët e tyre dhe rruga e autobusëve mund të personalizohet sipas preferencave të çiftit.

Shërbimet me qira të autobusëve të dasmave janë të disponueshme në qytete të shumta në provinca si Guangdong, Jiangsu dhe Shandong.

Çmimet për marrjen me qira të autobusëve të dasmave variojnë nga disa qindra deri në mijëra juanë për automjet në ditë, bazuar në distancën e përshkuar dhe kohëzgjatjen.

Ma Yuxuan dhe Cai Yang, një çift i sapomartuar nga qyteti Qingdao (Qindao), provinca Shandong e Kinës Lindore, e zbukuruan autobusin e tyre të dasmës me dekorime festive dhe vendosën fotot e tyre të dasmës brenda dhe jashtë.

"Ky është një autobus dasmash elegant dhe i ri, që është ekskluziv për ne",- tha Cai, duke shtuar se disa nga miqtë e tyre u tërhoqën nga atmosfera gazmore dhe gjithashtu kanë menduar të marrin autobusë në ditën e tyre të madhe.

foto: Xinhua

Duke kujtuar ditën e saj të dasmës, Tang Shanqing, një e sapomartuar nga qyteti Suqian në provincën Jiangsu, kujton po ashtu përvojën e saj të mrekullueshme me autobusin e dasmës.

"Kalimtarët na fotografuan, shoferët e tjerë ulnin xhamat për të na përshëndetur dhe ne u dhamë fëmijëve ëmbëlsirat e dasmës. Ndjeva sikur njerëzit në të gjithë qytetin ishin dëshmitarë dhe ndanë lumturinë tonë",- tha ajo.

Tang vuri në dukje se në vend të marrjes me qira të sedanëve, përdorimi i një autobusi publik si mjeti i dasmës është i gjelbër, me karbon të ulët dhe miqësor ndaj mjedisit, gjë që përputhet me vlerat dhe stilin e jetës së të rinjve.