Kashgar, “dhurata e Galasë së Festës së Pranverës” ka tërhequr turistët
2024-02-15 15:51:27

“Skenat që i pashë drejtpërdrejt janë pak të ndryshme nga ato që i kam parë në televizion, sepse shikimi nga afër duket më mahnitës.” tha z. Chen Xiangda, banor i qytetit Kashgar. 

Më 11 shkurt, ditën e dytë të Vitit të Ri Kinez, Chen erdhi në vendin ku u zhvillua pjesa e Galasë së Festës së Pranverës 2024 të Grupit Mediatik të Kinës (CMG) në Kashgar të Xinjiang-ut. Ai i vlerësoi shumë skenat me drita shumëngjyrëshe si në botën përrallore.

Në mbrëmjen e 9 shkurtit, vigjiljen e Festës së Pranverës, Vitit të Ri Kinez, u zhvillua si çdo vit Galaja e Festës së Pranverës. Si një nga katër vendet dytësore të kësaj galaje, skenat në Kashgar i paraqitën botës forcën e veçantë tërheqëse të këtij qyteti të lashtë mijëravjeçar dhe pasqyruan jetesën e lumtur të kombësive të ndryshme në Rajonin Autonom të Xinjiang-Ujgurit.

foto nga VCG

Kashgari ka qenë një qytet i famshëm kulturor përgjatë Rrugës së Mëndafshit qysh nga lashtësia. Në vendin dytësor në Kashgar të Galasë së CMG-së këtë vit u caktua si temë kryesore “Mbi jetën”. Kjo ide erdhi nga mbledhja e elementeve folklorike prej ekipit të regjisorëve në këtë qytet. Duke shikuar tërë qytetin e lashtë nga një kullë e lartë, regjisorët u tërhoqën nga çatitë e banesave, që janë të ngjeshura, por kanë logjikë të brendshme. Ata zbuluan gjithashtu se ujgurët e kanë zakon të këndojnë e kërcejnë në çatitë e shtëpive të tyre. Regjisorët e përdorën këtë zakon të vendësve përgjatë gjithë shfaqjes. Në vendin dytësor të Galasë së CMG-së në Kashgar, krahas një skene të madhe kryesore, u krijuan edhe skenat e vogla në 12 çati të banesave të thjeshta, duke gërshetuar arkitekturën reale me skenën artistike dhe u ofruar shikuesve përvojën e veçantë të shikimit të shfaqjes.

foto nga Xinhua

Mësohet se skena kryesore e kësaj Galaje të CMG-së do të mbetet në Kashgar përgjithmonë. Një “dhuratë e Galasë së CMG-së” si kjo bëhet për herë të parë në historinë e vendeve dytësore të galasë, me qëllim që Kashgari, ky qytet mijëvjeçar, të tërheqë më shumë turistë.

Qysh prej 10 shkurtit, ditës së dytë pas përfundimit të Galasë, skena kryesore në Kashgar u hap zyrtarisht për turistët dhe gjatë 15 ditëve deri te Festa e Fenerëve do të ketë shfaqje dritash çdo mbrëmje.

“Jam me fat që mund të vizitoj vendin dytësor të Galasë së CMG-së në herën e parë që vij në Kashgar. Skena përpara syve është më e bukur se shikimi ndërmjet ekranit,” tha Gai Xuejiao, një turiste nga Shangai.

foto nga Xinhua

Banori i Kashgarit Mehmet Mattohti e vizitoi skenën kryesore të galasë së bashku me tërë familjen. Ai u tërhoq nga dera në formë harku, e projektuar në bazë të formës së banesave vendëse “Aiuang” në vendet e shikuesve përballë skenës. “Kjo është shumë e ngjashme me formën e derës e dritareve të shtëpisë sonë. E mrekullueshme,” vuri në dukje ai.

Zhang Jianhua dhe pesë anëtarët e tjerë të familjes së tij, që banojnë në qytetin Yining, erdhën në Kashgar për të vizituar kushëririn gjatë Festës së Pranverës. Ai shkoi posaçërisht te skena kryesore e Galasë “për të parë shfaqjen e dritave që do të fillojë në orën 9 në mbrëmje”.

Zhang-u i tha gazetarit të CMG-së se në vigjiljen e festës, kur transmetimi i drejtpërdrejt i Galasë së CMG-së kaloi te skena kryesore e Kashgarit, veshjet, vallet dhe veglat muzikore të bukura të Xinjiang-ut i entuziazmuan të gjithë anëtarët e familjes. “Famijët më kërkuan që të vizitojnë skenën e Galasë. Vendi i skenës kryesore është më mahnitës se në ekran. Një skenë aq e madhe me aq shumë drita u përfundua brenda 21 ditëve. Sa u përpoqën ndërtuesit! I falënderojmë nga zemra!” tha Zhang-u me emocion.

foto nga Xinhua

“Do ta shfrytëzojmë si duhet këtë skenë. U kemi dhënë ftesë grupeve të shquara artistike për të dhënë shfaqje këtu. Do të përpiqemi ta kthejmë këtë skenë në një pikë turistike të domosdoshme gjatë vizitës në Kashgar,” tha drejtorja e kulturës dhe e turizmit e Kashgarit Pattirman Tur.

Në fakt, me t’u publikuar lajmi që do të vendosej vendi dytësor i Galasë së CMG-së në Kashgar, u shtua numri i vizitorëve në këtë qytet. Vetëm në janar të këtij viti, Kashgari priti 1.6 milionë turistë dhe pati 1.3 miliardë juanë të ardhura nga turizmi. (Wang Lei/ Artan)

NA NDIQNI
Follow @CRIShqipNews
NA NDIQNI
NA NDIQNI
Lajmet Kryesore