Foto nga CFP
Një ekosistem kompjuterik personal me inteligjencë artificiale po formohet në Kinë dhe kjo do të rrisë popullaritetin e kompjuterëve me inteligjencë artificiale në vend, thanë drejtuesit dhe ekspertët e kompanisë.
Ekosistemi përfshin prodhuesit e harduerit, prodhuesit e çipave, zhvilluesit e programeve kompjuterike dhe zhvilluesit e modeleve të mëdha të gjuhëve (LLM), të cilët mund të ndihmojnë në popullarizimin e kompjuterëve me inteligjencë artificiale, ose kompjuterëve që integrojnë inteligjencë artificiale në procesorët e tyre.
“Këta kompjuterë janë të aftë të ekzekutojnë në mënyrë të pavarur modelet e mëdha të gjuhëve dhe aplikacione. Kompjuterët me inteligjencë artificiale kanë potencialin të bëhen asistentë ekskluzivë të zgjuar që kuptojnë me të vërtetë nevojat e një përdoruesi”,- tha Ablikim Abrimiti, zv.president i “Lenovo Group”.
“Do të duhet kohë që i gjithë ekosistemi të marrë formën e duhur. Kompjuterët me inteligjencë artificiale fillimisht do të kalojnë një fazë të gatshme për inteligjencën artificiale dhe arkitektura e çipit do të përmirësohet në një arkitekturë hibride të inteligjencës artificiale, e cila do të përshpejtojë inovacionin e aplikacioneve të inteligjencës artificiale.
Me përfshirjen e modeleve të mëdha të gjuhëve personale dhe me një ekosistem të hapur të aplikacioneve të inteligjencës artificiale, kompjuterët me inteligjencë artificiale do të futen në skenën e inteligjencës artificiale, duke e bërë 2024-n vitin e parë të kompjuterëve me inteligjencë artificiale”,- tha Abrimiti.
Laptopët me inteligjencë artificiale pritet të përbëjnë gati 90 për qind të shitjeve totale të laptopëve në Kinë deri në vitin 2027, sipas të dhënave nga kompania e kërkimit të tregut “International Data Corp”.
Sipas kësaj kompanie, deri në vitin 2026, gati 50 për qind e procesorëve të përdorur nga pajisjet terminale në tregun kinez pritet të kenë teknologjinë e motorit të inteligjencës artificiale.
Peter Chen, zv.president dhe menaxher i përgjithshëm i qendrës së të dhënave të Kinës dhe grupit të inteligjencës artificiale në “Intel Corp”, tha se inteligjenca artificiale jo vetëm që po ndryshon mënyrën se si njerëzit jetojnë, por gjithashtu po sjell në mënyrë efektive ndryshime në zhvillimin dhe inovacionin e secilës industri.
“Intel” bëri të ditur se është e përkushtuar të ofrojë portofole produktesh gjithëpërfshirëse, softuerë të optimizuar, mjete të larmishme dhe një ekosistem të gjerë, për të mundësuar që më shumë klientë të ofrojnë mbështetje për “cloud computing”, rrjetin dhe zgjidhjet në shkallë të gjerë.
Kompania zbuloi procesorët e saj të gjeneratës së ardhshme për laptopë ultra të hollë javën e kaluar, duke ngritur një sfidë të re kundër rivalëve në kategorinë në zhvillim të kompjuterëve me inteligjencë artificiale.
Procesorët e sapolançuar “Core Ultra Meteor Lake” kanë një njësi përpunimi qendror, një njësi përpunimi grafik dhe, për herë të parë, një njësi përpunimi nervor, për të trajtuar detyrat e inteligjencës artificiale me fuqi të ulët.
Lëvizja e “Intel” vjen në një kohë kur inteligjenca artificiale dhe efikasiteti i energjisë po bëhen gjithnjë e më të rëndësishme. Si një partner strategjik i “Intel”, “Lenovo ka lançuar kompjuterët e tij më të fundit me inteligjencë artificiale të mundësuar nga çipat më të fundit të kompanisë me bazë në SHBA.
Zhou Feng, zv.president ekzekutiv i “NetEase”, tha se kompjuterët me inteligjencë artificiale do të sjellin mundësi të mëdha zhvillimi në industri dhe kompania ka zhvilluar një model të madh të gjuhëve të përshtatur për industrinë e arsimit.
Wang Jiping, zv.president i “International Data Corp China”, tha se integrimi i motorëve të inteligjencës artificiale në pajisjet elektronike do të jetë faktor vendimtar suksesi në të ardhmen e afërt.
Sipas ekspertëve, aplikacionet vendase të inteligjencës artificiale, ose aplikacionet e zhvilluara për epokën e inteligjencës artificiale, po rriten me shpejtësi në Kinë. Ndërkohë, aplikacionet tradicionale do të përmirësohen në ato të mundësuara nga modelet e mëdha të gjuhëve.
Jerry Liu, kreu i kërkimit në internet në Kinë në “UBS”, tha se një cikël i ri kompjuterik do të shfaqet çdo 10 ose 15 vjet dhe inteligjenca artificiale gjeneruese do të jetë fillimi i ciklit të ardhshëm.
“Kina ka më shumë përdorues të inteligjencës artificiale gjeneruese dhe më shumë të dhëna në krahasim me ekonomitë e tjera, kështu që besoj se ka shumë mundësi këtu”, tha Liu.
