Automjeti me energji elektrike "Smart" i prodhuar bashkërisht nga prodhuesi magneti kinez i automjeteve "Geely" dhe “Mercedes-Benz” / foto nga CFP
Zinxhiri i furnizimit të automjeteve të Kinës me energji të re (NEV) kërkon në mënyrë aktive bashkëpunim të zgjeruar me partnerët globalë, pavarësisht rritjes së fundit të kontrollit rregullator për automjetet elektrike kineze.
"Ne mbajmë gjithmonë një qëndrim të hapur dhe bashkëpunues, duke punuar krah për krah me partnerët globalë për të eksploruar së bashku perspektivat e gjera të tregut",- tha Victor Yang nënkryetar i lartë i prodhuesit të madh kinez të automjeteve “Zhejiang Geely Holding Group”, në Ekspozitën Ndërkombëtare të Zinxhirit të Furnizimit në Kinë (CISCE) në Pekin.
Kjo është ekspozita e parë në botë e zinxhirit të furnizimit në nivel kombëtar. Duke iu drejtuar ceremonisë së hapjes së aktivitetit, kryeministri kinez, Li Qiang, bëri thirrje për bashkëpunim të zgjeruar global në zinxhirët industrialë dhe të furnizimit.
Kina është tregu më i madh i automjeteve me energji të re në botë. Megjithatë, ky sektor u vu nën një kontroll rregullator në rritje kohët e fundit pasi BE-ja nisi një hetim kundër subvencioneve për automjetet elektrike kineze në tetor. Shoqata Kineze e Prodhuesve të Automjeteve e quajti hetimin "një akt të dukshëm proteksionizmi".
Pavarësisht kësaj, prodhuesit e automjeteve me energji të re dhe furnizuesit përkatës në ekspozitë mbajnë perspektiva pozitive në bashkëpunimin me partnerët globalë.
foto nga CFP
Ningbo Shanshan Co., Ltd., një prodhues kinez i materialeve të baterive litium, njoftoi planet në shtator për të investuar deri në 1.28 miliardë euro (rreth 1.4 miliardë dollarë amerikanë) në ndërtimin e një fabrike të re në Finlandë. Ky është projekti i parë i kompanisë jashtë shtetit.
Zheng Ju, kryetar i kompanisë, tha se kompania do të jetë e rrënjosur fort në tregun kinez ndërsa do të zgjerojë praninë e saj globalisht për t'u integruar thellë në industrinë inteligjente globale të automobilave.
"Ne jemi të përkushtuar ndaj hapjes dhe bashkëpunimit për të punuar me partnerët globalë, për të bërë përparime inovative dhe për të zhvilluar teknologjitë e gjeneratës së ardhshme së bashku",- shtoi Zheng.
Shenzhen Colibri Technologies Co., Ltd., një furnizues i pajisjeve të automatizimit dhe testimit për montimin e paketave të moduleve të baterive, ka degë në Tajlandë, Singapor dhe shumë vende të tjera.
Që nga themelimi i saj në vitin 2001, kompania është fokusuar në zgjerimin global,- tha Gang Wei, kreu i qendrës së saj të marketingut. Në vitin 2022, të ardhurat nga biznesi i saj i eksportit përbënin rreth një të pestën e totalit të kompanisë.
"Ne kemi një qëndrim plotësisht të hapur ndaj bashkëpunimit ndërkombëtar dhe mirëpresim më shumë ndërmarrje të huaja që të bashkëpunojnë me ne",- tha Gang.
Pavijoni i automjeteve elektrike në Ekspozitën Ndërkombëtare të Zinxhirit të Furnizimit në Kinë / foto nga CFP
Zhang Shaogang, nënkryetar i Këshillit të Kinës për Promovimin e Tregtisë Ndërkombëtare, theksoi se industria e automobilave në Kinë ka një bazë të plotë zinxhiri të industrisë nga ana e kërkesës në anën e ofertës, me avantazhe të jashtëzakonshme në fusha të tilla si teknologjia e re e baterive dhe niveli i inteligjencës.
"Kjo ka nxitur transformimin e tregut të Kinës nga një konsumator i madh i automobilave në një bashkëpunëtor kryesor në teknologjinë e automobilave",- tha Zhang. "Ka sjellë mundësi të reja për zhvillimin e industrisë globale të automobilave dhe rritjen e qëndrueshme ekonomike".
Në ekspozitë, partnerët afatgjatë brenda zinxhirit të furnizimit të automobilave renditën përfitime të konsiderueshme nga bashkëpunimi me partnerët e tyre të zinxhirit të furnizimit kinez.
Chen Yudong, president i “Bosch China”, tha se “Bosch” ka përfituar shumë nga ritmi i rritjes dhe cilësia e zhvillimit të industrisë kineze të automobilave.
“Pas një dekade kultivimi, zhvillimi i automjeteve me energji të re i Kinës ka sjellë shumë përparësi në zinxhirin tonë të furnizimit lokal”,- tha ai. "Si pjesë e zinxhirit të furnizimit kinez, “Bosch” ka përfituar gjithashtu nga një transformim, përmirësim dhe zhvillim i tillë".
Song Gang, nëndrejtor i prodhimit të “Tesla Inc”, tha se kompania filloi të punojë me shumë ndërmarrje kineze më shumë se një dekadë më parë dhe bashkëpunimi u thellua më tej në 2019-n.
"Suksesi i “Tesla”-s në Kinë është, në një masë më të madhe, suksesi i zinxhirit tonë të furnizimit kinez",- tha Song. "Tesla do të vazhdojë të thellojë praninë e saj në Kinë, të forcojë vazhdimisht investimet e saj dhe të ndërtojë një zinxhir furnizimi efikas dhe me cilësi të lartë".
