Foto RTSH

Futbollisti portugez Cristiano Ronaldo po përballet me një padi kolektive në SHBA për promovimin e “Binance”, shkëmbimi më i madh i kriptomonedhave në botë.

Paditësit pretendojnë se reklamimi i tij i shtyu ata të bënin investime me humbje. Ata po kërkojnë dëmshpërblim prej një shume që tejkalon 1 miliard dollarë, shkruan “RTSH”.

Në nëntor 2022, “Binance” njoftoi koleksionin e parë “CR7” të monedhave virtuale në partneritet me Ronaldon.

Në një video të mediave sociale duke njoftuar partneritetin, Ronaldo u tha investitorëve të mundshëm se do të ndryshonin lojën dhe do ta çonin futbollin në nivelin tjetër.

Monedha më e lirë nga koleksioni ishte me çmim 77 dollarë kur doli në shitje në nëntor 2022, por një vit më vonë, çmimi i saj ishte rreth 1 dollarë.

Paditësit pretendojnë se promovimi i “Binance” nga Ronaldo i shtyu njerëzit të investonin. (Elona)