Wang Yongxian shfaqi një model "dougong" të krijuar nga ai në një tempull në Taiyuan të provincës Shanxi të Kinës Veriore/ foto nga “China Daily”
Pasi doli në pension si punonjës i mbrojtjes së relikteve kulturore 10 vjet më parë, Wang Yongxian e kultivoi pasionin e tij për arkitekturën e lashtë kineze përmes mësimdhënies.
Tani në moshën 73-vjeçare, ai vazhdon të shkruajë libra dhe teza dhe drejton një kurs të titulluar “Ruajtja dhe restaurimi i ndërtesave të lashta kineze” në Universitetin Normal Taiyuan në provincën kineze Shanxi.
Interesi i tij kryesor është "dougong", një metodë ndërtimi që përdor kllapa druri të ndërlidhura për të formuar struktura. Metoda ishte një nga më të rëndësishmet e arkitekturës së lashtë kineze.
Wang gjithashtu përdori internetin përmes blogjeve për të shpjeguar më mirë "dougong"-in për brezat e rinj kureshtarë dhe ka fituar shikueshmëri të lartë.
Studentët e tij të universitetit treguan interes të madh për kursin e tij, gjë që ai tha se e shtyu atë të shikonte mënyrat se si ata mund të mësonin më lehtë për këtë temë. Pas një sugjerimi nga studentët e tij, ai u bë një vloger duke përdorur emrin e llogarisë “Dougong class”.
Llogaria përditësohet rregullisht me videoklipe të shkurtra që Wang i realizon vetë. Ai tha se është i befasuar që materialet e tij janë kaq të ndjekura në rrjetet sociale.
Gjashtë leksionet e para mbi ndërtesat e lashta kineze që ai ngarkoi gjatë një periudhe gjashtëmujore kanë marrë rreth 1.6 milionë shikime.
Tempulli Jinci në qytetin Taiyuan të provincës Shanxi / foto nga CFP
Kultura e lashtë arkitekturore kineze është si një libër i mirë, shpjegoi ai, duke shtuar se është gjithashtu një mënyrë e rëndësishme për të treguar historinë e Kinës.
Sipas tij, pika më e mirë hyrëse për ta studiuar atë është përmes "dougong".
“Kurrikula duhet të kombinohet me vendet e arkitekturës antike, një bibliografi të specialiteteve të lashta, anatominë e modeleve të lashta arkitekturore "dougong", vizatime të punuara me dorë, praktikat e ndërtimit dhe animacionet shkencore popullore”,- tha ai.
Për ta bërë më të lehtë të kuptuarin e kësaj teme, Wang bëri një model "dougong" prej druri. Çdo komponent shënohet me një numër ose emër dhe modeli mund të çmontohet dhe rimontohet, një proces që ai e filmoi dhe e postoi në internet.
Disa përdorues të rrjetit thanë se kishin kohë që ishin në mëdyshje nga strukturat "dougong", por më në fund e kuptuan se si funksionojnë pasi panë videon e mjeshtrit të kësaj metode.
Metoda fillimisht u përdor për të bashkuar shtyllat dhe kolonat në kornizën e një çatie, më vonë u zhvillua në komponentë të ndërlidhur dhe arriti kulmin e përdorimit gjatë dinastive Tang (618-907) dhe Song (960-1279).
Sistemi strukturor fleksibël nuk mund të përballojë vetëm ngarkesa të larta, por është gjithashtu i shkëlqyer për përballimin e lëkundjeve sizmike dhe nuk është i prirë ndaj deformimeve, tha Wang.
Pas dinastisë Song, ndërtesat e rëndësishme u bënë më shumë dekorative sesa strukturore dhe nuk i përshtateshin më përshkrimit të arkitekturës tradicionale "dougong".
Roli i Shanxi
Rreth 85 për qind e strukturave prej druri të ndërtuara para dinastisë Yuan (1271-1368) që ekzistojnë ende në Kinë ndodhen në Shanxi. Arsyeja pse ato janë ruajtur nuk është vetëm për shkak të klimës dhe kushteve të favorshme gjeografike të krahinës, por edhe prej përpjekjeve të brezave të punëtorëve të mbrojtjes së relikteve kulturore.
Për më shumë se 50 vjet, Wang punoi si studiues në Institutin e Arkitekturës së Lashtë Shanxi dhe mori pjesë në projektet e planifikimit, mbrojtjes, projektimit dhe rinovimit të mbi 100 ndërtesave antike në provincë.
Ndërtesat përfshinin Tempullin Foguang në malin Wutai, Tempullin Chongfu në Shuozhou, Tempullin e Guangyu në Haizhou, Tempullin Jinci në Taiyuan dhe tempullin Xuankong në Hunyuan.
Tempulli Foguang në malin Wutai/ foto nga CFP
Wang është gati të përfundojë një libër, “Hulumtimi mbi Arkitekturën e Lashtë Kineze të Dougong”, i cili përmban më shumë se 200 ilustrime dhe 800 foto me ngjyra. Libri bazohet në kërkimin e tij të kryer gjatë më shumë se 50 viteve.
Wang ka lindur në Wuxiang, në Shanxi, ku ndodhen shumë tempuj, duke përfshirë edhe ata të lashtë, që i lanë përshtypje kur ishte i ri.
“Kur isha në shkollën fillore, mësuesi im më çoi për të vizituar tempullin Jinci në Taiyuan. U befasova kur pashë sallën kryesore të tempullit, duke u mrekulluar se sa të zgjuar ishin paraardhësit tanë në ndërtimin e asaj arkitekture madhështore dhe delikate me vetëm dru në shumicën e vendeve”,- tha Wang.
Sipas tij, ky udhëtim ngjalli interesin e tij për ndërtesat e lashta prej druri. Pas mbarimit të shkollës së mesme, Wang shkoi në fshat gjatë revolucionit kulturor (1966-‘76). Më vonë ai studioi art dhe letërsi në një shkollë që u bë pjesë e Kolegjit Profesional të Artit Shanxi. Shkolla ftoi ekspertë dhe profesorë nga Pekini për të dhënë leksione mbi mbrojtjen e ndërtesave antike, të cilat ringjallën ëndrrën e Wang për të studiuar arkitekturën antike. Ai shpejt e kuptoi se tempujt e lashtë të shpërndarë në të gjithë qytetin e tij ishin thesare historike. Në fillim të viteve 1970, ai nisi punën në Institutin e Arkitekturës së Lashtë Shanxi si mbrojtës i relikteve kulturore, duke e kthyer pasionin e tij në një karrierë të përjetshme.
Ajo që e gëzon sot nuk është vetëm se qeveria investon për kërkimin dhe mbrojtjen e relikteve kulturore, por edhe se shoqëria është më e vetëdijshme për rëndësinë e një pune të tillë.
Për habinë e tij, rreth 90 për qind e mbi 100.000 personave që ndjekin platformat e tij në internet ku ai ndan videot e shkurtra janë nën moshën 30-vjeçare. Ky fakt e bën atë më të sigurt se nëse historia e arkitekturës antike kineze tregohet në mënyrën e duhur, ajo mund të ndezë interesin e njerëzve.
