Nikollaq Muço jetën e tij e ka të lidhur me Gjirokastrën ku ka kryer shkollën industrial dhe ku vazhdon të jetojë. Në moshën 10 vjeçare Nikollaqi është aktivizuar në qitje ku ka marrë mësime nga Sadik Lengo, trajner i njohur i qitjes në Gjirokastër. Pas një ndërprerjeje disavjeçare në vitin 2003, në Tiranë u zhvillua Kampionati Body Building, ku Nikollaq Muço u shpall Kampion Kombëtar për moshat mbi 40 vjeç dhe nënkampion për të gjitha moshat. Muço u bë një shembull i shkëlqyer që tregon se ku arrin njeriu i apasionuar dhe me vullnet, që ka guxim dhe nerv, që punon, trajnon, fiton.
Në Kampionatin XIV Ballkanik të Body Buildingut, të zhvilluar në Athinë në vitin 2005, ai fitoi medaljen e argjendtë, duke u shpallur nënkampion ballkanik në kategorinë mbi 40 vjeçarë dhe peshë nën 80 kg. Nikolaq Muço shkëlqeu në Body Building në dy veprimtari të rangut botëror, të zhvilluara në Kaliforni të SHBA-ve, duke pasqyruar karakter të fortë sportiv. Së fundmi ai është shpallur sërish kampion në kampionatin në Bosnje-Hercegovinë. Eksperiencat e tij sportive dhe arritjet Nikollaq Muço tregon permes një interviste për Radio Ejani.
CMG: Si ndiheni për gjithë këtë eksperiencë të gjatë mbi supe?
Nikollaq Muço: Është një ndjesi e mirë dhe kjo më bën mua disa herë më shumë krenar për veten, por edhe për të të gjithë të tjerët, të cilët i frymëzoj përmes punës sime. Ajo që unë kam dashur gjithmonë ka qenë të ndjek ëndrrat e mia. Kam qenë pasionant për sportin qëkur isha ende fëmijë dhe këtë gjë më pas e kam vijuar për të treguar sa i fortë dhe këmbëngulës jam. Numëroj dhjetra, pjesëmarrje të cilat mua më kanë rritur dhe më kanë bërë ky që jam sot. Eksperiencat janë të shumta aq sa unë nuk mund t’i numëroj të gjitha e megjithatë gëzoj një kujtesë të mirë dhe prej secilës nga pjesëmarrjet e mia arrij të kem kujtimet më të mira.
CMG: Ne njohim në të gjitha aktivitetet ku keni marrë pjesë, por të ndalemi tek eksperienca e fundit ku ju dhe katër persona të tjerë ishit konkurentë. Ju spikatët pasi garonit në moshat 60-70 vjeç?
Nikollaq Muço: Po unë garoja në atë kategori, një kategori që për hir të së vërtetës të bën të ndihesh shumë sfidues me veten. Unë u shpalla sërish në vend të parë dhe kjo më dha nje satisfaksion të madh. Nuk do e kem asnjëherë fuqinë që të tërhiqem nga ky sport dhe do vijoj të jem një konkurent i përjetshëm pavarësisht moshës. Me këtë lloj sporti unë kam nisur seriozisht që në vitin 2003 dhe çdo ditë jam stërvitur rreth një orë.
CMG: Ju jeni 62-vjeç, a ka ardhur ky sport i vështirë për ju me kalimin e moshës?
Nikollaq Muço: Është e vërtetë që kam mbushur 62-vjeç, por për mua mosha është thjesht një shifër dhe nuk e përmend asnjëherë. Mua vetja më duket si para 40-viteve. Kam zhvilluar gjithmonë aktivitet fizik dhe s’kam për të rreshtur dhe garuar kurrë. Mosha është thjesht numër, do vijoj të garoj, pasi në shumë vende të botës në këtë lloj sporti ka edhe konkurentë të cilët janë 70-vjeç ose edhe më shumë.
CMG: A mendoni të zhvilloni nje garë tjetër sportive përpos asaj të fundit që u shpallët kampion?
Nikollaq Muço: Në 9 Nëntor të këtij viti do të zhvillohet një tjetër event sportiv, tek i cili shpresoj që të marr pjesë përmes një sponsori dhe uroj e besoj që të dal në 5 vendet e para të globit, por mbetet për t’u parë në vijim.
CMG: Ju si një sportist i madh në moshë, çfarë këshille keni për sportistët e rinj?
Nikollaq Muço: Mesazhi është që të merren me aktivitet fizik të paktën një orë në ditë, aty shkarkohen të gjitha energjitë negative ndaj dhe është e nevojshme. Më pas nëse merren me këtë lloj sporti, mosha është thjesht numër gjithë jetën.
Në këtë kampionat që u zhvillua në Bosnjë-Hercegovinë, i pranishëm dhe konkurent ishte dhe Niko Janushi por ky i fundit për moshat e reja. Ai ka zgjedhur gjithashtu të ndajë eksperiencën me Radio Ejani, si dhe të japë këshilla rreth sportit.
CMG: Niko, si nisët ju të merreshit me Body Building?
Niko Janushi: Kisha shumë kohë që stërvitesha dhe që isha një nga ata të rinj pasionantë të cilët punojnë çdo ditë me veten. Mirëpo, të merresh thjesht me sport dhe palestër nuk ishte e mjaftueshme ndaj unë vendosa të nis nje sfidë të re me veten, duke parë edhe shembuj pozitivë të cilët merreshin me Body Bulding ndaj vendosa ta nis karrierën time në këtë fushe.
CMG: Sot ju keni një kartë “Elite”, çfarë të ofron kjo?
Body Bulding: Marrja e një karte “Elite”, të jep mundësine që të ndjekësh të gjitha ëndrrat dhe të jesh një nga ata njerëz që mund ta ushtrosh apo konkurrosh në krah të profesionistëve. Kjo kartë mua personalisht më hapi shumë dyer dhe mundësi të shkëlqyera. Unë jam shumë i lumtur që kam mundësi ta ndjek këtë karrierë. Arritja në këtë nivel ka qenë e vështirë, por kam një qëllim në mendje që të konkurroj në evente botërore dhe pritshmëritë e mia do të jenë gjithmonë për më shumë nga vetja.
