foto: VCG
Aktualisht, konflikti i fundit palestinezo-izraelit që zgjat prej një jave, ka shkaktuar mbi 3 500 viktima nga të dyja palët. Kombet e Bashkuara kanë paralajmëruar se situata humanitare në Gaza po përkeqësohet me shpejtësi.
Por pse konfliktet palestinezo-izraelite shpërthejnë vazhdimisht? Shkaku themelor qëndron në faktin se dëshira e kahershme e Palestinës për të krijuar një shtet të pavarur nuk është realizuar dhe padrejtësia historike e vuajtur nga populli palestinez nuk është korrigjuar. Shpërthimi i këtij raundi të konfliktit palestinezo-izraelit dëshmon edhe një herë se "zgjidhja me një shtet" nuk do të funksionojë dhe vetëm do ta fusë Palestinën dhe Izraelin në një cikël konflikti; zbatimi i "zgjidhjes me dy shtete" është rruga kryesore për zgjidhjen e çështjes palestineze. Për këtë arsye, Kombet e Bashkuara, vendet arabe, Kina, Rusia, Bashkimi Evropian etj., i kanë bërë thirrje Palestinës dhe Izraelit që të pushojnë zjarrin dhe t'i japin fund luftës sa më shpejt të jetë e mundur, t'u kthehen negociatave për "zgjidhjen me dy shtete" dhe të arrijnë bashkëjetesën paqësore.
“Zgjidhja me dy shtete” e njohur nga komuniteti ndërkombëtar i referohet krijimit të një shteti të pavarur palestinez të bazuar në kufijtë e vitit 1967, me Jerusalemin Lindor si kryeqytet dhe që gëzon sovranitet të plotë. Një kusht i rëndësishëm për realizimin e këtij plani është që Palestina dhe Izraeli t'i përmbahen parimit "tokë për paqe" dhe të shkëmbejnë pronësinë e disa tokave në këmbim të një paqeje të qëndrueshme dhe të drejtë.
foto: VCG
Ndërsa çështja palestineze margjinalizohet gradualisht, përmbajtja e "zgjidhjes me dy shtete" e njohur nga komuniteti ndërkombëtar po përballet me sfida të reja. Madje ka zëra ekstremistë në Izrael, të tilla si "zgjidhja e një shteti" dhe "zgjidhja me shumë shtete", të cilët besojnë se Izraeli mund të mbajë "një shtet të tij" dhe të pushtojë Bregun Perëndimor në afat të gjatë, ose të krijojë shumë shtete palestineze në Bregun Perëndimor, duke e fragmentarizuar më tej shoqërinë palestineze.
Për më tepër, për shkak të konsideratave të brendshme politike dhe strategjike globale, Shtetet e Bashkuara mbështesin në masë të madhe Izraelin, kërkojnë të normalizojnë marrëdhëniet midis vendeve arabe dhe Izraelit dhe injorojnë kërkesat palestineze, duke bërë që procesi i paqes në Lindjen e Mesme të devijojë nga rruga e duhur.
Në ditët e sotme, me shpërthimin e një raundi të ri konfliktesh midis Palestinës dhe Izraelit, gjithnjë e më shumë njerëz po kuptojnë se megjithëse "zgjidhja me dy shtete" përballet me shumë sfida, ajo është ende e vetmja zgjidhje konsensusi për komunitetin ndërkombëtar për të ndrequr çështjen palestinezo-izraelite dhe asnjë kombinim tjetër nuk mund ta zëvendësojë.
Nga njëra anë, "zgjidhja me dy shtete" mishëron frymën e rezolutës së Kombeve të Bashkuara për çështjen palestinezo-izraelite. Që nga shpërthimi i luftës së parë në Lindjen e Mesme në vitin 1948, Kombet e Bashkuara kanë miratuar rezoluta të shumta për çështjen palestinezo-izraelite, thelbi i të cilave bazohet në "zgjidhjen me dy shtete" për të arritur paqen midis Palestinës dhe Izraelit.
foto: VCG
Në të njëjtën kohë, "zgjidhja me dy shtete" është e vetmja e pranueshme si për Palestinën, ashtu edhe për Izraelin. Shumica dërrmuese e izraelitëve ende besojnë se "zgjidhja me dy shtete" është mundësia e vetme për të arritur bashkëjetesën paqësore midis Palestinës dhe Izraelit. Pa synimin e krijimit të një shteti të pavarur palestinez, konflikti palestinezo-izraelit është i destinuar të vazhdojë.
Përveç kësaj, "zgjidhja me dy shtete" është gjithashtu e vetmja mënyrë për të siguruar paqe të qëndrueshme në Lindjen e Mesme. Shumica dërrmuese e vendeve arabe besojnë se një paqe e qëndrueshme dhe e drejtë midis Palestinës dhe Izraelit, e ndërtuar nën "zgjidhjen me dy shtete", është një parakusht për normalizimin e marrëdhënieve arabo-izraelite. Lidhja Arabe mbajti një takim urgjent në Kajro më 11 tetor, duke i kërkuar Izraelit t'i kthehej negociatave për "zgjidhjen me dy shtete" dhe t'u sigurojë palestinezëve një shtet të qëndrueshëm.
Sipas lajmeve të fundit, i dërguari special i qeverisë kineze për çështjen e Lindjes së Mesme do të vizitojë së shpejti vendet përkatëse në rajon për të ndihmuar në qetësimin e situatës. Në të njëjtën kohë, Kina bën thirrje që një konferencë ndërkombëtare për paqen të mblidhet sa më shpejt të jetë e mundur nën drejtimin e Kombeve të Bashkuara. “Zgjidhja me dy shtete” ka një rrugë të gjatë përpara, por është një konsensus ndërkombëtar. Rruga e duhur për të çuar përpara këtë plan është rifillimi i bisedimeve të paqes sa më shpejt të jetë e mundur dhe të gjithë mekanizmat që nxisin paqen duhet të luajnë një rol aktiv.
