Foto nga VCG
Anija kineze e kërkimeve shkencore gjeofizike "Shiyan-6" (Eksperimenti 6) u nis nga qyteti Guangzhou i provincës Guangdong të Kinës Jugore të dielën për një udhëtim ekspedite në zonën lindore të Oqeanit Indian.
Anija, e organizuar nga Instituti i Oqeanologjisë i Detit të Kinës Jugore (SCSIO) të Akademisë Kineze të Shkencave, planifikohet të qëndrojë në det për 80 ditë duke kryer 28 projekte kërkimi shkencor nga 13 ekipe kërkimore në bordin e saj, duke mbuluar një interval prej më shumë se 12 000 miljesh detare (rreth 22 200 kilometra).
Udhëtimi, i bazuar në vëzhgime shumëdisiplinore, synon të marrë një sasi të madhe të dhënash bazë për zbulimin e mekanizmave me të cilat proceset dinamike ndikojnë në ciklet biogjeokimike, ekosistemet dhe proceset sedimentare në atë rajon, duke qartësuar modelin gjeografik të biodiversitetit në zonën e studimit, duke zbuluar reagimin dhe rolin tregues të komuniteteve biologjike ndaj proceseve fizike, dhe duke kuptuar njëkohësisht ndryshimet paleoklimatike, bëri të ditur për Grupin Mediatik të Kinës kryeshkencëtari i ekspeditës, Wang Weiqing.
Foto nga VCG
Një sistem vrojtimi do të vendoset në zonën kryesore të vëzhgimit për të studiuar sistemin e tanishëm në evolucionin topografik vendor dhe marrëdhëniet e tij me sedimentet dhe gjeologjinë e shtratit detar, tha ai.
Udhëtimi pritet gjithashtu të forcojë bashkëpunimin dhe shkëmbimet në fushën e kërkimeve shkencore me vendet përgjatë Rrugës Detare të Mëndafshit dhe të realizojë më tej integrimin e shkencës dhe arsimit për t'i shërbyer nismës "Një brez, një rrugë", tha Lin Qiang, drejtuesi i projektit dhe zëvendësdrejtori i SCSIO-s.
Me një investim të përgjithshëm prej mbi 500 milionë juanësh (rreth 77 milionë dollarë), "Shiyan-6" cilësohet si një nga forcat kryesore të anijeve me tonazh prej 3 000 tonë të Kinës për kërkime shkencore në thellësitë oqeanike.
Foto nga VCG
Anija, me përmasë 90.6 metra të gjatë dhe 17 metra të gjerë, ka një zonë të hapur operacionale të kuvertës më shumë se 600 metra katrorë dhe mund të mbajë një ekuipazh prej 60 anëtarësh për 60 ditë në det.
